Tonino Picula, raportuesi i ri i Parlamentit Evropian për Serbinë

Përfaqësuesi socialist dhe demokrat kroat Tonino Picula (SDP) u zgjodh raportues i Parlamentit Evropian për Serbinë dhe në atë pozitë do të zëvendësojë Vladimir Bilçikun, përfaqësuesin sllovak nga Partia Popullore Evropiane (EPP).

Në mbledhjen e fundit të Parlamentit Evropian, Picula ishte koordinator i SD-së në Komisionin për Punë të Jashtme (AFET). Ai ishte i ngarkuar me detyrën e kryetarit të Grupit të Punës për Ballkanin Perëndimor në AFET dhe raportues i përhershëm i PE-së për marrëdhëniet me SHBA-në dhe Malin e Zi.

Ai gjithashtu ka punuar si raportues i PE-së për rekomandimet për Ballkanin Perëndimor përpara samitit të Zagrebit, si edhe anëtar i delegacionit për marrëdhëniet me Bosnjë e Hercegovinën dhe Kosovën dhe zëvendës anëtar i delegacionit në Komisionin Parlamentar për Stabilizim dhe Asociim të BE-së dhe të Serbisë.

Në qershor të këtij viti ai u zgjodh për herë të katërt si përfaqësues i Parlamentit Evropian.

“Politika e zgjerimit është një proces kërkues që kërkon një përpjekje të vazhdueshme nga vendi kandidat për të përmbushur kriteret e njohura. Serbia duhet të bindë partnerët e saj në BE se i justifikon ambiciet e saj me ndryshime reale në një numër çështjesh të hapura,” tha Picula gjatë një takimi me ambasadorin serb në BE, Danijel Apostoloviq.

Picula ishte ministër i Punëve të Jashtme në qeverinë e Ivica Raçanit (2000-2003), si edhe përfaqësues i Parlamentit kroat, përfaqësues i Parlamentit në Asamblenë Parlamentare të OSBE-së dhe kryetar i Komunës së Goricës së Madhe.