Turizmi nis me festë – Ulqini gati për Verën 2025
Muaji maj në Ulqin sjell një atmosferë festive dhe një kalendar të pasur ngjarjesh kulturore e artistike, të cilat do të japin startin e sezonit turistik në mënyrën më të bukur të mundshme!
Organizata Turistike e Ulqinit, në bashkëpunim me Komunën e Ulqinit dhe institucionet e tjera lokale, ka përgatitur një seri aktivitetesh për të gjitha moshat dhe shijet, duke pasqyruar trashëgiminë kulturore, talentin muzikor dhe shpirtin mikpritës të qytetit tonë.
Nga 1 deri më 4 maj, nis gjithçka me Panairin e Artizanateve – një ngjarje që mbledh artizanë dhe krijues nga mbarë rajoni në pazarin e suvenireve. Më 9 Maj, në ambientin e mrekullueshëm të Shasit, do të mbahet Nata e Kështjellave – një mbrëmje magjike mes historisë dhe natyrës.
Për dashamirët e traditës, 17 maji sjell Ditën e Kublave në Plazhin e Vogël – një festë tradicionale që mishëron shijen e vërtetë të Ulqinit.
Koncertet e mëdha do të ndjekin njëra-tjetrën: Amadeus Band më 21 maj, Orkestra Simfonike e RTSH-së më 26 maj, dhe një koncert i muzikës klasike me Iliriana Gjonin (piano) dhe Bledar Zajmin (çello) më 29 maj – të dy në Qendrën për Kulturë. Mbrëmjen finale të Majit, më 31, do ta ndezë Era Istrefi me një koncert të paharrueshëm në Plazhin e Vogël.
Sezoni kulmon më 1 qershor, me Ditën Botërore të Fëmijëve, ku organizohen aktivitete të shumta për më të vegjlit, po ashtu në Plazhin e Vogël.
Këto aktivitete janë një ftesë e hapur për të gjithë – vendës, turistë dhe vizitorë – për të zbuluar dhe përjetuar Ulqinin në një mënyrë të veçantë. Me përkushtimin e Organizatës Turistike të Ulqinit dhe mbështetjen e plotë të Komunës së Ulqinit dhe institucioneve të tjera lokale, ky muaj do të jetë një vitrinë e shkëlqyer e potencialit turistik dhe kulturor të qytetit tonë.
Ejani në Ulqin – ku kultura, muzika dhe mikpritja bashkohen në një përvojë të paharrueshme!
