Zelensky propozon takim të nivelit të lartë për paqe, shqyrtohen Turqia, Vatikani ose Zvicra si vendtakim

Presidenti ukrainas, Volodymyr Zelensky, ka njoftuar se po shqyrtohet organizimi i një takimi të nivelit të lartë mes Ukrainës, Rusisë, SHBA-së, vendeve të BE-së dhe Britanisë, si një hap i rëndësishëm drejt përfundimit të luftës.

Pas një bisede telefonike me presidentin amerikan Donald Trump, Zelensky theksoi dëshirën që takimi të mbahet sa më shpejt dhe se vendtakimet e mundshme janë Turqia, Vatikani ose Zvicra, raporton BBC.

Thirrja e tij e mëparshme me Trumpin çoi në biseda edhe me udhëheqësit e Francës, Finlandës, Gjermanisë, Italisë dhe Bashkimit Evropian.

Presidenti ukrainas po ashtu njoftoi se një shkëmbim i madh të burgosurish midis dy vendeve mund të ndodhë brenda ditësh ose javësh. Ai pranoi se situata mbetet sfiduese, por mbetet i përqendruar në gjetjen e paqes.