Pas operacionit në zemër, Jordania kthen në zonën e luftës foshnjën nga Gaza

Në një tendë të improvizuar në kampin e refugjatëve Al-Shati, në veri të Rripit të Gazas, 33-vjeçarja Enas Abu Daqqa mban në krahë vajzën e saj të vogël, Niveen. Një ventilator gumëzhin vazhdimisht pas saj për të thyer vapën e mëngjesit.

Enas shqetësohet se shëndeti i Niveenit mund të përkeqësohet në çdo moment. Ajo është vetëm shtatë muajshe dhe ka lindur me një vrimë në zemër, gjatë luftës.

Ndërsa nëna e saj shpjegon se si luftoi për ta mbajtur veten gjallë mes një sistemi shëndetësor në kolaps në Gaza, Niveeni, me sytë e saj të mëdhenj kafe dhe trupin e imët, qan dhe shqetësohet.

“Lufta ka qenë shumë e vështirë për të”, i thotë Enas BBC-së.

“Ajo nuk po shtonte peshë dhe sëmurej shumë lehtë”.

E vetmja mundësi e Niveenit për të mbijetuar ishte të merrte kujdes urgjent jashtë Gazës. Në fillim të marsit, Jordania e mundësoi këtë.

Ndërsa armëpushimi midis Hamasit dhe Izraelit u mbajt në fuqi, 29 fëmijë të sëmurë nga Gaza, përfshirë Niveenin, u evakuuan në Jordani për të marrë trajtim në spitalet e vendit.

Ata ishin fëmijët e parë të evakuuar në Jordani, pasi mbreti Abdullah njoftoi planet për të trajtuar 2,000 fëmijë të sëmurë nga Gaza në spitalet atje. Këto evakuime u koordinuan me autoritetet izraelite, të cilat bëjnë verifikime të të dhënave të prindërve që udhëtojnë me fëmijët e tyre.

Mjekët në Jordani kryen me sukses operacionin në zemër të hapur të Niveenit dhe ajo po fillonte të shërohej ngadalë.

Por rreth dy javë pas fillimit të trajtimit të fëmijëve, armëpushimi në Gaza përfundoi kur Izraeli rifilloi ofensivën kundër Hamasit dhe lufta u rikthye.

Për javë të tëra, Enas ndoqi lajmet nga dhoma e spitalit të vajzës së saj në Jordani, duke u shqetësuar për sigurinë e burrit të saj dhe fëmijëve të tjerë që ishin ende në Gaza.

Dhe pastaj, natën vonë, më 12 maj, autoritetet jordaneze i thanë Enasit se do ta dërgonin atë dhe familjen e saj përsëri në Gaza të nesërmen, pasi thanë se Niveeni e kishte përfunduar trajtimin e saj.

Enasi u trondit.

«Ne u larguam ndërsa kishte një armëpushim. Si mund të na kthenin mbrapsht pasi lufta kishte rinisur?» thotë ajo e frustruar.

Enas tani është ribashkuar me bashkëshortin dhe fëmijët e saj në Gaza. Ata thonë se Niveeni nuk e përfundoi trajtimin e saj përpara se të kthehej mbrapsht dhe shqetësohen se gjendja e saj mund të përkeqësohet.

“Vajza ime është në një gjendje shumë të keqe që mund të çojë në vdekjen e saj”, thotë Enas.

“Ajo ka sëmundje të zemrës. Ndonjëherë mbytet dhe bëhet blu. Nuk mund të vazhdojë të jetojë në një tendë.”

Më 13 maj, Jordania njoftoi se kishte dërguar 17 fëmijë përsëri në Gaza pasi kishin përfunduar trajtimin e tyre.

Autoritetet jordaneze i kanë thënë BBC-së se të gjithë fëmijët e kthyer ishin në gjendje të mirë shëndetësore, duke hedhur poshtë pretendimet se ata nuk e kishin përfunduar trajtimin e tyre.

Autoritetet vunë në dukje se mbretëria ishte e qartë që nga fillimi në lidhje me qëllimin e saj për t’i kthyer fëmijët pasi të ishin më mirë, duke shtuar se kjo ishte e nevojshme “për arsye logjistike dhe politike”.

“Politika e Jordanisë është t’i mbajë palestinezët në tokën e tyre dhe të mos kontribuojë në zhvendosjen e tyre jashtë territorit të saj”, thuhej në një deklaratë të ministrisë së jashtme dërguar BBC-së. Kthimi i 17 fëmijëve do të lejonte gjithashtu që më shumë fëmijë të sëmurë të evakuoheshin nga Gaza”, deklarojnë ato.

Por një zyrtar në ministrinë e shëndetësisë të drejtuar nga Hamasi në Gaza i tha BBC-së se fëmijët ende kishin nevojë për kujdes dhe se kthimi i tyre në luftë ua rrezikonte jetën./BBC/