Izraeli publikon ‘hetimin fillestar’ për sulmet në spitalin në Gaza

Një ditë pas sulmeve vdekjeprurëse izraelite në spitalin Nasser në Khan Younis që vranë të paktën 20 persona, përfshirë pesë gazetarë, ushtria izraelite ka publikuar “hetimin e saj fillestar” mbi atë që ka ndodhur.

Sipas mediave të huaja, thuhet se nga hetimi ka rezultuar se sulmi kishte në shënjestër “një kamer të pozicionuar nga Hamasi në zonën e Spitalit Nasser”, që pretendon se po përdorej për të vëzhguar ushtrinë izraelite.

Raporti shton se “disa boshllëqe” do të duhet të shqyrtohen më tej, duke përfshirë llojin e municionit të përdorur, si dhe procesin e autorizimit dhe vendimmarrjes në lidhje me sulmet.

Kujtojmë se sot pati protesta në të gjithë Izraelin, duke bërë thirrje për lirimin e pengjeve që mbahen ende nga Hamasi në Gaza, shkruan A2 CNN.

Të quajtura “dita e përçarjes” nga forumi familjar i Pengjeve dhe Familjeve të Zhdukura, protestat bënë thirrje që lufta të përfundonte në mënyrë që pengjet të mund të ktheheshin.

Ndërsa e gjithë kjo po ndodhte, kryeministri izraelit Benjamin Netanyahu kryesoi një takim të kabinetit të sigurisë.

Në atë takim thuhet se zyrtarët do të miratojnë planet për fazat e ardhshme të operacionit ushtarak të Izraelit në Qytetin e Gazës, por nuk do të përfshijë diskutime rreth një propozimi për armëpushim të paraqitur nga ndërmjetësit rajonalë.