Bajrami: Kurti s’i ka numrat, po shihet kush është bllokuesi

Shefja e Grupit Parlamentar të Lidhjes Demokratike të Kosovës (LDK), Hykmete Bajrami, ka deklaruar pas seancës konstituive të Kuvendit se Albin Kurti nuk i ka numrat për të formuar Qeverinë dhe për këtë arsye po zvarritet procesi me zgjedhjen e nënkryetarit të pestë të Kuvendit.

“Sot është bërë e qartë për të gjithë se kush është bllokuesi. Pas kaq shumë ditësh nga zgjedhjet e 9 shkurtit, ende jemi në një situatë ku institucionet nuk janë funksionalizuar,” tha Bajrami.

Ajo kujtoi se LDK-ja ka refuzuar që nga fillimi të marrë pjesë në votime të ndara për nënkryetarët, duke iu referuar vendimit të fundit të Gjykatës Kushtetuese, që sipas saj, obligon vazhdimin e konstituimit sipas marrëveshjes së 8 prillit.

“Ekziston edhe procesverbali i takimit ku partitë politike janë pajtuar që nënkryetarët të votohen në pako dhe në mënyrë të hapur çka është konfirmuar edhe në dy vendime të Gjykatës Kushtetuese,” theksoi ajo.

Bajrami tha se përpjekjet për të anashkaluar marrëveshjet politike dhe vendimet kushtetuese vetëm sa e thellojnë krizën institucionale në vend./IndeksOnline/