Albulena Haxhiu: Të ecim përpara me qeverinë e re, ose t’i drejtohemi zgjedhjeve

Nënkryetarja e Kuvendit të Kosovës, Albulena Haxhiu, ka deklaruar se është urgjente që institucionet të funksionalizohen dhe vendi të ecë përpara, qoftë me formimin e qeverisë së re, qoftë përmes zgjedhjeve të reja.

Pas përfundimit të seancës së Kuvendit, Haxhiu tha se puna duhet të nisë menjëherë me kryetarin dhe nënkryetarët e zgjedhur të Kuvendit pavarësisht se ende nuk është zgjedhur një përfaqësues nga komuniteti serb.

“Është e papranueshme që një subjekt që nuk e njeh shtetin tonë të pretendojë të ketë rol në proceset demokratike që vetë i mohon. Nuk guxojmë të mbetemi peng i atyre që mohojnë ekzistencën tonë si shtet”, theksoi Haxhiu.

Ajo shtoi se Lëvizja Vetëvendosje është e përkushtuar që të ecet përpara në mënyrë institucionale.

“Është e rëndësishme të ecim përpara me kryesinë, kryetarin dhe nënkryetarët e zgjedhur. Jemi të interesuar të shkojmë përpara ose me një qeveri të re, ose përmes zgjedhjeve,” përfundoi Haxhiu./IndeksOnline/