Mijëra njerëz evakuohen në Berlin për shkak të një bombe të Luftës së Dytë Botërore

Mijëra njerëz në Berlinin Qendror u urdhëruan të evakuoheshin të enjten në mbrëmje, pasi një bombë e pashpërthyer e Luftës së Dytë Botërore u zbulua në lumin Spree.

Policia ngriti një perimetër sigurie prej 500 metrash në një zonë të dendur me popullsi në qendër të kryeqytetit gjerman, shkruan DW-ja, transmeton Klankosova.tv.

Oficerët shkuan derë më derë brenda perimetrit të sigurisë për të informuar banorët për urdhrin e evakuimit.

Rreth 10 mijë njerëzve iu tha të largoheshin nga shtëpitë e tyre, sipas policisë.

Gazeta Tagespiegel e Berlinit raportoi radhë të gjata në një strehë emergjence gjatë natës në bashkinë e qytetit në lagjen Berlin Mitte, me qindra njerëz të raportuar që prisnin të regjistroheshin në një vend për të kaluar natën. Një strehë tjetër u hap pak pas mesnatës për të akomoduar numrin e madh të njerëzve.