Avokatët e reperit “Diddy” kërkojnë shfuqizimin e dënimit, shtyhet seanca

Avokatët e reperit Sean “Diddy” Combs u rikthyen në gjykatën e Nju Jorkut për t’i kërkuar një gjyqtari të shfuqizojë dënimet e tij për prostitucion ose të lejojë një gjyq të ri. Gjyqtari Arun Subramanian e shtyu seancën dëgjimore dhe nuk mori menjëherë një vendim mbi kërkesën e mbrojtjes. Producenti amerikan i muzikës, i cili u akuzua për drejtimin e një operacioni të gjerë trafikimi seksual, është burgosur që nga arrestimi i tij shtatorin e kaluar. Ai u dënua në korrik për dy akuza për prostitucion.

Avokatët e Combs-it argumentojnë se dënimet e tij ishin një keqpërdorim i Aktit Mann, një ligj federal që u miratua për të luftuar trafikimin e qenieve njerëzore dhe shfrytëzimin seksual të grave. Dënimi i Combsit do të jepet më 3 tetor. Reperi dhe magnati i muzikës përballet me deri në 10 vjet burgim për secilën akuzë. Por ekipi i tij ligjor ka propozuar që ai të mos marrë më shumë se një dënim prej 14 muajsh. Meqenëse reperi ka mbetur në paraburgim federal, ai do ta kishte vuajtur tashmë pjesën më të madhe të dënimit të tij.

Megjithatë, prokurorët kërkojnë disa vite më shumë. Avokatët e Combsit kanë argumentuar gjithashtu se ai u dënua padrejtësisht sipas Aktit Mann dhe zbatimi i ligjit të vitit 1910 në rastin e Combsit është “i pashembullt”. Në seancën dëgjimore të së enjtes, avokatja mbrojtëse e Combsit, Alexandra Shapiro, e portretizoi atë si një voyeur që kënaqej, duke prodhuar dhe shikuar pornografi amatore, sipas CBS News, partnerit mediatik të BBC-së në SHBA.

Gjykatësi e pyeti avokatin mbrojtës disa herë se çfarë lidhje kishte kjo me akuzat e Aktit Mann për transportimin e njerëzve për prostitucion. Ata thanë se Combsi nuk kishte asnjë motiv komercial. Nëse gjykata refuzon të japë lirim nga akuzat, avokatët e tij argumentuan se kërkohet një gjyq i ri për shkak të “paragjykimeve të rënda nga një mori provash nxitëse.