Trump i bindur për planin për Gazën: Kësaj here do të triumfojmë, pritet përgjigjja nga Izraeli

Dje, një dëshmitar përshkoi rrugët e Gazës dhe përshkroi tmerrin: bomba që bien pa pushim çdo 20 minuta, ndërsa vdekjet pushtojnë jo vetëm rrugët, por edhe spitalet, aty ku duhej të mbrohej jeta.

Kjo pamje e trishtë dhe e zymtë është thirrja urgjente në Shtëpinë e Bardhë mes Donald Trumpit dhe Benjamin Netanyahut, një përballje që mund të vendosë fatin e një populli të torturuar. Një tjetër imazh, po aq tragjik, është dëshpërimi i familjeve të pengjeve; dje, grupi Hamas njoftoi se ka humbur gjurmët e dy prej tyre për shkak të bombardimeve.

Pikërisht këto tema do të diskutohen sot në Shtëpinë e Bardhë, ku kryeministri izraelit do të duhet të përgjigjet për planet e fundit të paqes amerikane: 21 pika që parashikojnë fundin e luftës, lirimin e pengjeve, çarmatimin e Hamasit dhe formimin e një qeverie tranzitore.

Presioni brenda Izraelit ndaj Netanyahu për të pranuar planin është shumë i madh: rrugët janë plot, politikanët e qendrës dhe të majtës ofrojnë mbështetje qeverisë nëse ajo pranon, ndërsa forcat e djathta ekstreme kërcënojnë me krizë politike. Kryeministri duket i vetëdijshëm për rëndësinë e momentit: “Po punojmë. Shpresojmë të japim miratimin”, tha ai në një intervistë për Fox News-in.

Ai shtoi se do të pranojë mërgimin për udhëheqësit e Hamasit që janë ende gjallë, por se qëndrimi i tij për Autoritetin Kombëtar Palestinez mbetet i pandryshuar: për të, qeveria e Ramallahut nuk mund të ketë rol në të ardhmen e Rripit të Gazës, një kusht i papranueshëm për vendet arabe.

Në këto pikë kanë dështuar deri tani të gjithë planet e paqes, dhe mund të dështojë edhe ky i fundit i Trump-it. Presidenti amerikan është i bindur se kësaj here do të ketë një kthesë në Gaza dhe, pse jo, edhe mundësinë për të fituar Çmimin Nobel për Paqen, që do të jepet brenda pak ditësh. «Të gjithë janë të përfshirë në diçka të veçantë, për herë të parë ndonjëherë. Do ta realizojmë!», shkroi dje në rrjetet sociale, duke shtuar në një intervistë për Axios se “vendet arabe kanë bërë një punë fantastike. Hamas do t’i ndjekë ata”.

Megjithatë, pozicioni i grupit përgjegjës për sulmin e 7 tetorit mbetet një nga pasiguritë më të mëdha të ditës. Zyrtarisht, Hamas thotë se nuk ka marrë një marrëveshje dhe nuk mund të marrë një vendim. Për këtë temë, Trump foli edhe me kryeministren italiane Giorgia Meloni, në një bisedë telefonike dje në mbrëmje për situatën në Gazë. Meloni theksoi pozicionin e Italisë: po për armëpushim dhe lirimin e pengjeve.

Ndërsa pritet qartësimi i situatës sot, në Izrael kërkesa për një marrëveshje është shumë e fortë: “Dy vjet pas katastrofës së 7 tetorit, kryeministri i atij 7 tetori ndodhet në një kryqëzim kritik, ndoshta përfundimtar në luftë”, shkruante dje Ben Caspit në Maariv, një nga komentuesit më të njohur të atmosferës në Izrael. “Ai mund të pranojë marrëveshjen, të shpallë fitoren dhe të thërrasë zgjedhje, ose të vazhdojë të vonojë, me koston e jetëve të pengjeve, duke vënë në provë durimin gjithnjë në tkurrje të Trump-it, për të fituar disa javë apo muaj të tjerë për koalicionin e tij shkatërrues. Në pak fjalë, Netanyahu duhet të zgjedhë mes qeverisë së tij dhe vendit.”

Ndërkohë, autoritetet palestineze përditësojnë bilancin e viktimave: vetëm dje u regjistruan 50 të vdekur, duke kaluar tashmë shifrën 66 mijë që nga 7 tetori 2023./tvklan.al