SHBA dërgon sistem anti-dronë në Danimarkë për samitin e BE-së

Shtetet e Bashkuara kanë dërguar sisteme mbrojtëse kundër dronëve në Danimarkë, në kuadër të masave të sigurisë për samitin e Bashkimit Evropian që do të mbahet këtë javë.

Lajmi u konfirmua të martën nga Ministria e Mbrojtjes e Danimarkës, pas raportimeve për fluturime të paautorizuara dronësh mbi territorin danez, të cilat kanë shkaktuar mbylljen e disa aeroporteve, përfshirë edhe atë të Kopenhagenit – aeroporti më i madh në Evropën Veriore.

Përveç SHBA-ve, edhe Finlanda, Franca, Gjermania, Holanda, Norvegjia, Polonia dhe Suedia kanë dërguar teknologji kundër dronëve për të mbështetur Danimarkën në garantimin e sigurisë gjatë samitit, i cili do të mbledhë mbi 47 krerë shtetesh dhe qeverish të mërkurën dhe të enjten.

“Jemi të kënaqur dhe mirënjohës që SHBA-të gjithashtu mbështesin Danimarkën me aftësi kundër dronëve në lidhje me samitin e ardhshëm,” thuhet në një postim zyrtar të Ministrisë së Mbrojtjes në platformën X.

Pamjet e fundit të dronëve mbi zona të ndryshme të vendit, përfshirë instalime ushtarake, kanë ngritur shqetësime për sigurinë kombëtare. Megjithatë, nuk janë raportuar incidente të reja që nga data 27 shtator.

Për të shmangur çdo rrezik të ngatërresës mes dronëve civilë dhe atyre të mundshëm armiqësorë, autoritetet daneze kanë vendosur të mbyllin hapësirën ajrore për fluturimet civile me dron deri të premten.

Zyrtarët danezë kanë shprehur shqetësimin për mbikëqyrje të mundshme nga Rusia, duke e cilësuar situatën si një kërcënim të mundshëm përmes sulmeve hibride dhe sabotimeve. Si masë shtesë, të martën është ngritur niveli i sigurisë për impiantet energjetike në “portokalli” – niveli i dytë më i lartë në sistemin danez të alarmit.