Arrestohen dy djemtë e ish-Missit Valbona Selimllari
Dy djemtë e ish-Miss Shqipërisë, Valbona Selimllari, janë arrestuar nga Policia e Tiranës pas një incidenti të rëndë të ndodhur në orët e para të mëngjesit të sotëm.
Burime zyrtare konfirmojnë se Deni dhe Kejni Selimllari, përkatësisht 21 dhe 18 vjeç, kanë goditur një efektiv policie “për shkak të detyrës”, duke shkaktuar më pas dëme materiale në ambientet e komisariatit.
Incidenti në Komisariatin Nr. 2
Sipas raportit të Policisë, pas ndalimit, të rinjtë janë shoqëruar në Komisariatin Nr. 2 në Tiranë, ku nuk kanë ndalur sjelljen agresive.
Ata kanë thyer kamerën e sigurisë, dëmtuar derën e dhomës së shoqërimit dhe kanë kërcënuar efektivët e pranishëm, duke e përshkallëzuar situatën.
Ngjarja është dokumentuar me pamje nga kamerat e mbetura funksionale në ambientet e brendshme të komisariatit.
Burime nga uniformat blu bëjnë me dije se materialet i janë referuar Prokurorisë pranë Gjykatës së Shkallës së Parë Tiranë, për vijimin e procedurave ligjore.
Kjo nuk është hera e parë që emrat e djemve të Valbona Selimllarit përmenden në incidente të dhunshme.
Vetëm pak javë më parë, ata u përfshinë në një konflikt fizik në Dhërmi, në prani të dhjetëra turistëve, por arritën të shmangnin ndëshkimin penal falë ndërhyrjeve të shpejta dhe mungesës së kallëzimeve.
Rasti ka shkaktuar debat në rrjete sociale, duke ngritur pyetje mbi trajtimin e barabartë të qytetarëve përpara ligjit, veçanërisht kur bëhet fjalë për persona të lidhur me figura publike.
Nëse akuzat konfirmohen, Deni dhe Kejni Selimllari rrezikojnë dënime për goditje ndaj punonjësit të rendit publik dhe dëmtim prone shtetërore, vepra që parashikojnë deri në 5 vite burg sipas Kodit Penal.
