Venezuela mbyll ambasadën në Norvegji, shkak “Nobeli” i paqes

Venezuela njoftoi se do të mbyllë ambasadën e saj në Oslo, disa ditë pasi udhëheqëses së opozitës María Corina Machado iu dha çmimi “Nobel” për paqen.

Në një deklaratë, Qeveria venezueliane nuk komentoi mbi çmimin e Machados, duke thënë se mbyllja ishte pjesë e një ristrukturimi të shërbimit të saj të jashtëm.

Ministria e Jashtme e Norvegjisë konfirmoi se Karakasi kishte mbyllur ambasadën e saj në Oslo pa dhënë një arsye, raporton BBC-i, transmeton Klankosova.tv.

Komiteti i Nobelit në Oslo i dha asaj çmimin të premten në njohje të asaj që e quajti “puna e saj e palodhur në promovimin e të drejtave demokratike për popullin e Venezuelës”, ndërsa udhëheqësi venezuelian Nicolás Maduro e quajti laureaten 58-vjeçare një “shtrigë djallëzore”.