Von der Leyen: Anëtarësimi i Malit të Zi në BE është në prag

Presidentja e Komisionit Evropian, Ursula von der Leyen, ka deklaruar se anëtarësimi i Malit të Zi në Bashkimin Evropian është realisht “në prag”, duke vlerësuar progresin e bërë nga vendi në procesin e integrimit dhe duke theksuar nevojën për përshpejtimin e reformave.

Këto komente ajo i bëri gjatë hapjes së Konferencës së parë investuese Mali i Zi – BE, e cila po mbahet në destinacionin turistik Luçtica, afër Tivatit.

“Qëllimi që Mali i Zi të anëtarësohet në BE është realisht i prekshëm. Janë bërë hapa pozitivë, dhe është koha për të investuar në Mal të Zi”, tha Von der Leyen.

“Jeni shumë ambiciozë – dhe ne këtë e pëlqejmë”, shtoi ajo.

Ajo theksoi se reformat në sundimin e ligjit, rritja e transparencës në prokurimet publike dhe një ambient më i favorshëm për biznesin janë kyçe për të treguar se Mali i Zi është një vend i besueshëm për investime.

Kryeministri i Malit të Zi, Milojko Spajiq, vlerësoi Bashkimin Evropian si partnerin më të rëndësishëm strategjik dhe investitorin më të madh në vend.

“Do të fillojë një cikël investimesh që do të sjellë mbi tre miliardë euro. Kjo është mesazhi kryesor nga sot: Mali i Zi është i hapur për biznese dhe tani është koha për të investuar,” tha ai.

Spajiq tha se Mali i Zi është në prag të anëtarësimit në BE, duke shtuar: “Deri në fund të vitit 2026 do të mbyllim të gjitha kapitujt negociues, në mënyrë që të bëhemi anëtarë të BE-së deri në fund të vitit 2028.”

Ai e cilësoi këtë edhe si një mundësi për BE-në që të dëshmojë se politika e zgjerimit është ende “gjallë dhe aktuale.”

Konferenca është përqendruar në zhvillimin e qëndrueshëm, ku janë prezantuar katër projekte investimesh evropiane në ekonominë malazeze dhe 10 memorandume mirëkuptimi në fusha të ndryshme.

Von der Leyen vlerësoi përkushtimin e Malit të Zi ndaj politikës së jashtme të BE-së, sidomos në raport me qëndrimin ndaj Rusisë.

“Agresioni rus ndaj Ukrainës ka ndryshuar kontinentin tonë. Çdo komb evropian duhet të zgjedhë anën e tij. Mali i Zi e ka bërë tashmë këtë zgjedhje, shumë qartë,” tha ajo.

“Jeni tërësisht të harmonizuar me politikën e jashtme dhe të sigurisë së BE-së. E vlerësojmë thellësisht vendimin tuaj për të dërguar ushtarë për të mbështetur misionin tonë trajnimor në Ukrainë.”

Presidentja e KE-së inkurajoi Malin e Zi të shfrytëzojë fondet prej 380 milionë eurosh nga Plani për Rritje për Ballkanin Perëndimor, duke konfirmuar se vendi do të marrë fillimisht 8 milionë euro, pasi ka përmbushur kriteret për këtë fazë.

Ajo gjithashtu njoftoi se nga viti 2026 do të hiqet roaming-u mes Malit të Zi dhe BE-së.

Kryeministri Spajiq tha se më 4 nëntor pritet të publikohet raporti i ri i Komisionit Evropian për progresin e Malit të Zi, duke theksuar se ai do të reflektojë progresin, por edhe sfidat e mbetura.

“Raporti do të pasqyrojë arritjet e mëdha të periudhës së fundit, por edhe detyrat që na presin,” u shpreh Spajiq.

Raporti do të përqendrohet në përmbushjen e kritereve për anëtarësim, me theks të veçantë në sundimin e ligjit, luftën kundër korrupsionit, demokracinë dhe përafrimin me acquis communautaire të BE-së.

Mali i Zi ka hapur negociatat për anëtarësim në BE që nga viti 2012, dhe deri më tani ka mbyllur shtatë nga 33 kapituj negociues, duke përfshirë katër kapituj të mbyllur vetëm në vitin e fundit, ndër to edhe kapitullin për prokurimet publike dhe të drejtën e pronësisë intelektuale. /REL