Hakerët rrezik për pacientët: Regjistrohet vdekja e parë për shkak të një sulmi kibernetik

Autoritetet britanike kanë regjistruar një rast vdekjeje që besohet të lidhet me një krim kibernetik, tani që sulmet ndaj sistemeve të shëndetësisë po bëhen një kërcënim real për jetën e pacientëve.

Aeroporti Heathrow, Marks & Spencer, Jaguar Land Rover – Biblioteka Britanike. Këto janë disa nga kompanitë dhe institucionet kryesore në Mbretërinë e Bashkuar që kanë rënë viktimë e krimit kibernetik në dy vjetët e fundit, raporton Daily Mail.

Në qershor, King’s College Hospital NHS Foundation Trust konfirmoi se një pacient kishte “vdekur papritur” gjatë një sulmi kibernetik që gjymtoi shërbimet e tij vitin e kaluar.

Kriminelët përdorën ransomware – softuer që “ngrin” pjesë të mëdha të një rrjeti derisa të paguhet një shpërblim – për të provuar të zhvatin para nga trust-i, megjithëse kuptohet se nuk e kanë paguar.

Një hetim zbuloi se një numër faktorësh kontribuan në vdekjen e pacientit – duke përfshirë “një pritje të gjatë për rezultatin e një analize gjaku për shkak të sulmit kibernetik që ndikon në shërbimet e patologjisë”.

Besohet të jetë rasti i parë i regjistruar i një pacienti të NHS-së që vdes për shkak të krimit kibernetik. Por ekspertët kanë frikë se nuk do të jetë i fundit.

“Është e pashmangshme që më shumë jetë të humbasin nëse hakerat godasin shërbime thelbësore si NHS-ja”, thotë profesor Alan Woodward, një specialist i sigurisë kibernetike në Universitetin e Surreyt.

“Këta njerëz janë kriminelë të llojit më të keq. Nuk duhet të presim që ata të zgjedhin objektiva për të minimizuar rrezikun për jetën – përkundrazi; ata zgjedhin objektiva ku urgjenca ka rëndësi për të detyruar pagesën”.

Provat anekdotike sugjerojnë se NHS-ja përballet me një bombardim 24 orë në ditë, me qindra, nëse jo mijëra, përpjekje të përditshme për hakim.