Lituania do të rrëzojë të gjitha objektet ajrore që hyjnë pa leje nga Bjellorusia, thotë kryeministrja Ruginienë

Kryeministrja e Lituanisë, Inga Ruginiene, deklaroi sot se vendi i saj do të nisë të shënjestrojë e të zbresë me armë balonët e trafikantëve që kalojnë kufirin nga Bjellorusia, balonë që kanë shkaktuar përsëri dhe përsëri probleme në trafikun ajror mbi vendin baltik.

Lituania mbylli aeroportin e Vilniusit katër herë javën e kaluar pas hyrjeve të balonëve në hapësirën e saj ajrore, dhe çdo herë mbylli përkohësisht pikat e kalimit kufitar me Bjellorusinë si përgjigje ndaj këtyre incidenteve.

Lituania ka thënë se balonët dërgohen nga trafikantë të duhanit kontrabandë nga Bjellorusia drejt BE-së, por po ashtu e akuzon presidentin bjellorus Aleksandër Lukashenko, aleatin e ngushtë të presidentit rus Vladimir Putin, se nuk i ndalon këto praktika.

Ruginiene i quajti incidentet “sulme hibride” dhe tha se pikat e kalimit kufitar me Bjellorusinë do të qëndrojnë të mbyllura, përveç udhëtimeve të diplomatëve dhe qytetarëve të Bashkimit Europian që largohen nga vendi fqinj.

“Sot vendosëm të marrim masat më të ashpra. Nuk ka rrugë tjetër,” tha Ruginiene në një konferencë për shtyp, duke shtuar se Lituania, si vend anëtar i NATO-s, mund të diskutojë gjithashtu thirrjen e nenit 4 të NATO-s për konsultime lidhur me sigurinë.

Aviacioni evropian ka rënë përsëri në kaos javët e fundit për shkak të mjeteve fluturuese pa pilot (dronëve) dhe shtrirjeve të tjera ajrore, përfshirë mbi aeroporte në Kopenhagë, Mynih dhe në rajonin e Baltikut.

Të enjten që lamë pas, Lituania deklaroi se dy avionë ushtarakë rusë hynë në hapësirën e saj ajrore për rreth 18 sekonda, çka solli një protestë zyrtare dhe reagim nga forcat e NATO-s, por Rusia mohoi përgjegjësinë.

Ministri i Jashtëm lituanez, Kestutis Budrys, tha se shkeljet e fundit të hapësirës ajrore nuk duhet parë si incidente të izoluara.
“Janë provokime të qëllimshme, të dizajnuara për të destabilizuar, për të shpërqendruar dhe për të provuar vendosmërinë e NATO-s,” shkroi ai në rrjetin social X. /balkanweb