KESCO promovon kursimin e energjisë në prag të sezonit të ftohtë

Në prag të sezonit të ftohtë, kur konsumi i energjisë elektrike zakonisht rritet ndjeshëm, KESCO ka nisur një fushatë vetëdijësuese për kursimin e energjisë elektrike, me qëllim informimin dhe ndërgjegjësimin e konsumatorëve për përdorim më efikas dhe më të qëndrueshëm të energjisë.

Përmes kësaj fushate, KESCO do të publikojë shembuj konkretë të faturave të energjisë elektrike, duke krahasuar shpenzimin dhe koston mes viteve – përpara dhe pas hyrjes në fuqi të tarifave të reja të miratuara nga Zyra e Rregullatorit për Energji në maj të vitit 2025. Këto krahasime do t’i ndihmojnë konsumatorët të kuptojnë më qartë ndikimin e tarifave të reja në faturat mujore dhe rëndësinë që ka kursimi në uljen e kostos.

Në këtë periudhë të ftohtë, një nga faktorët kryesorë të rritjes së konsumit mbetet ngrohja me energji elektrike, prandaj kursimi bëhet më i rëndësishëm se kurrë. Përmes postimeve dhe këshillave praktike nga ekspertët e kursimit, KESCO do të ofrojë udhëzime të thjeshta për uljen e konsumit, pa ndikuar në komoditetin e përditshëm të familjeve.

Disa nga rekomandimet përfshijnë:

·         Përdorimin racional të ngrohjes elektrike dhe përmirësimin e izolimit të hapësirave të banimit;

·         Shfrytëzimin e pajisjeve elektro-shtëpiake me efikasitet të lartë energjetik (klasa A+);

·         Shkëputjen e pajisjeve nga rrjeti kur nuk janë në përdorim;

·         Përdorimin e ndriçimit LED dhe menaxhimin më të mirë të ndriçimit në ambiente shtëpiake dhe zyrtare.

Përmes kësaj nisme, KESCO synon të rrisë ndërgjegjësimin publik për rëndësinë e kursimit të energjisë — jo vetëm për të ulur faturat, por edhe për të kontribuar në ruajtjen e qëndrueshmërisë energjetike të vendit.

Në ditët në vijim, KESCO do të publikojë shembuj të tjerë të faturave me konsum të ndryshëm, si dhe këshilla të reja praktike për kursim gjatë dimrit.