Dyshimet në Mitrovicë -Jug, reagon Memli Krasniqi: Shqetësimet janë serioze

Kreu i PDK-së, Memli Krasniqi ka reaguar lidhur me dyshimet për keqpërdorime të votave në Mitrovicën Jugore.

Krasniqi ka njoftuar se PDK-pja do të dorëzojë ankesën në PZAP.

“Prej mbrëmë, menjëherë pas njoftimit nga komisionerët tanë në Mitrovicë të Jugut për shqetësimet rreth integritetit të procesit zgjedhor atje, kemi ndërmarrë të gjithë hapat e nevojshëm për mbrojtjen e vullnetit të qytetarëve. Shqetësimet e paraqitura janë serioze dhe, si të tilla, po i adresojmë në të gjitha instancat dhe adresat përkatëse.
Sot, Partia Demokratike e Kosovës do të dorëzojë, brenda afatit ligjor, edhe ankesën e saj zyrtare në Panelin Zgjedhor për Ankesa dhe Parashtresa.
Në orën 12:00, në selinë e partisë do të kemi një konferencë për media për të bërë të ditura detajet dhe veprimet tona lidhur me këtë çështje.
Ne besojmë se çdo votë është zëri i qytetarit dhe themeli i demokracisë sonë. Prandaj, kur ekzistojnë dyshime apo paqartësi në proces, është e drejtë dhe detyrë ligjore që ato të shqyrtohen me kujdes dhe plotësisht nga institucionet përkatëse.
Pa paragjykuar rezultatin përfundimtar, PDK-ja kërkon që çdo procedurë të trajtohet me transparencë, drejtësi dhe në përputhje me ligjin, në mënyrë që besimi i qytetarëve në procesin zgjedhor të mbetet i plotë. Vota është e shenjtë në demokraci dhe PDK-ja është e vendosur ta mbrojë integritetin e zgjedhjeve dhe vullnetin e vërtetë të votuesve me përgjegjësi, qetësi dhe bindjen e plotë se e vërteta do të dalë në dritë”, thuhet në reagimin e Memli Krasniqit./Indeksonline/