OBSH: Turberkulozi la të vdekur mbi 1 milion njerëz vitin e kaluar

Organizata Botërore e Shëndetësisë ka bërë të ditur se vdekjet nga tuberkulozi kanë shënuar rënie me 3 për qind në 1.23 milionë njerëz në vitin 2024.

Në raportin e saj vjetor të publikuar të mërkurën, agjencia shëndetësore e Kombeve të Bashkuara zbuloi gjithashtu se rastet e përgjithshme të sëmundjes kishin rënë me pothuajse 2 për qind që nga viti 2023, shkruan Reuters, transmeton Dukagjini.

Rastet e vdekjeve me tuberkuloz shënuar rënie për herë te parë që nga pandemia COVID-19.

Në vitin 2024, një rekord 8.3 milionë njerëz iu drejtuan trajtimit për tuberkuloz pasi u diagnostikuan rishtazi, ndërsa normat e suksesit të trajtimit u rritën nga 68 në 71 për qind, tha OBSH-ja.

Megjithatë, agjencia shëndetësore paralajmëroi se përparimi i fundit në trajtimin e sëmundjes ishte nën kërcënim për shkak të mungesës së ndihmës. Shefi i OBSH-së Tedros Adhanom Ghebreyesus tha se kjo mund të “zhbëjë fitimet e fituara me vështirësi”.

Vitin e kaluar, 5.9 miliardë dollarë ishin në dispozicion për parandalim, diagnostikim dhe trajtim, shumë më poshtë objektivit vjetor prej 22 miliardë dollarësh deri në vitin 2027.

“Rënia e barrës globale të TB-së dhe përparimi në testim, trajtim, mbrojtje sociale dhe kërkime janë të gjitha lajme të mirëseardhura pas viteve të pengesave, por përparimi nuk është fitore”, tha shefi i OBSH-së.

“Fakti që TB-ja vazhdon të marrë mbi një milion jetë çdo vit, pavarësisht se është i parandalueshëm dhe i shërueshëm, është thjesht i pandërgjegjshëm” shtoi Tedros.

Megjithëse vdekjet nga tuberkulozi në vitin 2024 ishin 29 për qind më të ulëta se ato të regjistruara në 2015, OBSH-ja kishte shpresuar ta zvogëlonte këtë shifër me 75 për qind deri në vitin 2025 dhe 90 për qind deri në vitin 2030.

Numri i vdekjeve madje mund të rritet në vitet në vijim, paralajmëroi Tereza Kasaeva, drejtoreshë e divizionit të OBSH-së për tuberkulozin, HIV dhe infeksionet e lidhura me to.

“Shkurtimet afatgjata të financimit të donatorëve ndërkombëtarë mund të rezultojnë në deri në 2 milionë vdekje shtesë dhe 10 milionë njerëz të sëmuren me TB midis 2025 dhe 2035”, tha Kasaeva.

Agjencisë iu dha një goditje e rëndësishme financiare kur Shtetet e Bashkuara u tërhoqën nga ajo në janar, duke detyruar një shkurtim prej 21 për qind të shpenzimeve të saj të propozuara.

Vendimi i administratës së presidentit amerikan Donald Trump për të ulur ndihmën e huaj, veçanërisht nga Agjencia Amerikane për Zhvillim Ndërkombëtar, ka ngritur gjithashtu frikën për trajtimin global të TB.

Vitin e kaluar, ndihma kritike ndërkombëtare ndihmoi në parandalimin e 3.65 milionë vdekjeve nga sëmundja, sipas OBSH-së.