1 vit nga sulmi në “Ibër-Lepenci”, Mujka tregon rimëkëmbjen jetike të kanalit

Kryeshefi i Ndërmarrjes Hidroekonomike “Ibër-Lepenci”, Faruk Mujka, ka rikthyer në vëmendje sulmin në kanalin e Ibrit, të bërë një vit më parë.

Nëpërmjet një postimi, Mujka ka thënë se është bërë 1 vit nga një provim i rëndë, por që u kalua me sukses.

“Ekipet tona në bashkëpunim me kompaninë Famis CO arritën të implementojnë një zgjidhje të përkohshme brenda një kohe rekorde. Ekipet instaluan 6 gypa me diametër DN900, duke mundësuar rifillimin e rrjedhjes së ujit për furnizimin e konsumatorëve në orën 02:00 të datës 30 nëntor 2024, vetëm 7 orë pas sulmit” shkroi Mujka, lidhur me rimëkëmbjen e kanalit.

Ai u shpreh se nëse nuk do të ishte arritur sanimi i shpejtë i dëmit, pasojat për Kosovën do të ishin katastrofale dhe me dëme milionëshe.

Ky është postimi i plotë i tij:

1 vit nga provimi i rëndë por i kaluar me sukses mbi përgaditjen dhe gatishmërinë tonë për të ruajtur sovranitetin dhe funksionalitetin e plotë të shtetit tonë të ri.

Ora 19.00, një mot i ftohtë me shi e më vonë edhe me dëborë. Akuadukti në fshatin Varage, komuna e Zubin Potokut, pjesë e infrastrukturës së “Ibër-Lepencit“ u dëmtua rëndë nga një sulm terrorist. Si pasojë e këtij akti kriminal, u dëmtua rëndë pjesa fundore dhe njëra ballinë e akuaduktit, duke rrezikuar seriozisht furnizimin me ujë për të gjithë konsumatorët që shërbehen nga ky sistem.

Ekipet tona në bashkëpunim me kompaninë Famis CO arritën të implementojnë një zgjidhje të përkohshme brenda një kohe rekorde. Ekipet instaluan 6 gypa me diametër DN900, duke mundësuar rifillimin e rrjedhjes së ujit për furnizimin e konsumatorëve në orën 02:00 të datës 30 nëntor 2024, vetëm 7 orë pas sulmit.

Gjatë gjithë procesit të riparimit, janë ndërmarrë masa të veçanta për të siguruar sasi të mjaftueshme uji për Termocentralin Kosova B, duke parandaluar çdo ndërprerje të mundshme të furnizimit energjetik. Këto masa kanë qenë jetike për të shmangur një krizë të dyfishtë energjetike dhe ujore.

Nëse nuk do të ishte arritur sanimi i shpejtë i dëmit, pasojat për Kosovën do të ishin katastrofale dhe me dëme milionëshe. Vetëm në import të energjisë elektrike, kostoja do të kishte arritur mbi 2 milionë euro në ditë, pasi që Termocentrali Kosova B nuk do të kishte pasur mundësi të operojë pa ujin e kanalit për ftohje. Gjithashtu, do të kishim hyrë në ndërprerje totale të furnizimit me ujë për qytetin e Mitrovicës, Skenderajit, Drenasit, Vushtrrisë, Fushë Kosovës dhe gjysmës së Prishtinës, duke prekur qindra mijëra banorë dhe duke shkaktuar një krizë humanitare të paprecedentë.

Falë punës intensive të kontraktorit, u arrit që në afat rekord prej vetëm një muaji të përfundohet rindërtimi i plotë i akuaduktit të dëmtuar. Rrjedhja e ujit u rivendos plotësisht nëpërmjet akuaduktit, duke kthyer sistemin në kapacitetin e tij të plotë operativ.

Kosotoja e punëve në riparimin emergjent të akuaduktit të dëmtuar arriti vlerën prej 376,774.70 €.

Ky incident tregoi aftësinë e lartë reaguese të ndërmarrjes dhe partnerëve tanë në situata emergjente. Pavarësisht natyrës së rëndë të dëmtimit dhe sfidave të paraqitura, ekipet e angazhuara demonstruan profesionalizëm dhe efikasitet të jashtëzakonshëm, duke minimizuar ndikimin e këtij akti terrorist në furnizimin me ujë për konsumatorët dhe duke rivendosur funksionalitetin e plotë të sistemit brenda një periudhe relativisht të shkurtër kohore.

Reagimi i shpejtë dhe i koordinuar i ekipeve tona parandaloi dëme potenciale që do të arrinin dhjetëra milionë euro, duke mbrojtur jo vetëm furnizimin me ujë por edhe sigurinë energjetike të vendit.

Ndërmarrja mbetet e përkushtuar në ruajtjen dhe sigurimin e infrastrukturës së ujit si një aset kritik, dhe do të vazhdojë të përmirësojë kapacitetet e reagimit emergjent dhe sistemet e sigurisë për të parandaluar dhe menaxhuar incidente të ngjashme në të ardhmen.