Rritje e çmimeve të ilaçeve në SHBA, përfshirë vaksinat dhe trajtimet për kancer

Shumë prodhues ilaçesh në Shtetet e Bashkuara po planifikojnë të rrisin çmimet për të paktën 350 medikamente të markës, përfshirë vaksinat kundër COVID-19, RSV dhe shingjit, si dhe trajtimin e kancerit Ibrance, edhe pse administrata Trump ka ushtruar presion për ulje çmimesh, sipas të dhënave të firmës 3 Axis Advisors, shkruan Reuters.

Numri i rritjeve për vitin 2026 është më i lartë se një vit më parë, kur u njoftuan rritje për më shumë se 250 ilaçe. Mesatarja e rritjes është rreth 4%, e njëjtë me vitin 2025.

Shumica e rritjeve nuk reflektojnë zbritje ose rabate për sigurimet shëndetësore.

Nga ana tjetër, disa çmime do të ulen, përfshirë ilaçin për diabet Jardiance, me një ulje mbi 40%, pas negociatave të qeverisë amerikane për çmime më të ulëta në programin Medicare.

Sipas ekspertëve, prodhuesit po përpiqen të maksimizojnë fitimet duke negociuar zbritje pas skenës me sigurimet shëndetësore, ndërsa vendosin çmime më të larta për pagesat direkte nga pacientët.

Pfizer do të rrisë çmimet për rreth 80 ilaçe, përfshirë Ibrance, Paxlovid dhe disa medikamente të përdorura në spital, me rritje që variojnë nga 10% deri në 15% për vaksinat COVID.

Kompanitë argumentojnë se rritjet e çmimeve janë të nevojshme për të mbështetur inovacionin shkencor dhe për të përballuar kostot e operimit, ndërsa disa kompani europiane si GSK do të rrisin çmimet për ilaçe dhe vaksina nga 2% në 8.9%.

Janari është tradicionalisht muaji më i madh për rritje çmimesh të ilaçeve në SHBA, dhe pritet të ketë njoftime të reja për rritje dhe ulje çmimesh.