U kapën nga forcat speciale të SHBA, Trump zbulon vendndodhjen e Maduros dhe gruas së tij
Presidenti Donald Trump tha në “Fox & Friends Weekend” se diktatori venezuelian Nicolás Maduro dhe gruaja e tij u dërguan me helikopter në anijen luftarake USS Iwo Jima. Të dy u kapën gjatë një operacioni të shtunën në mëngjes në Karakas.
Prezantuesi i Fox News, Griff Jenkins, e pyeti Trumpin : “Megjithatë, para se të të lëmë të ikësh, a mund të na tregosh se ku janë Maduro dhe gruaja e tij në këtë moment?”
“Epo, ata do të shkojnë në Nju Jork”, tha Trump. Griffin ndërhyri, “a u çuan më parë në ndonjë anije?”
“Po, Iwo Jima,” tha Trump. “Ata do të shkojnë në Nju Jork. Helikopterët i nxorën jashtë dhe ata bënë një fluturim të këndshëm me helikopter. Jam i sigurt se u pëlqeu shumë, por kanë vrarë shumë njerëz”, shtoi më tej Trump.
“Madje edhe njerëz në vendin e tyre. Ata vranë shumë njerëz për të mbajtur pushtetin. Ai është një person shumë i egër”, vijoi Trump, shkruan A2 CNN.
Më herët të shtunën, Trump konfirmoi në Truth Social se SHBA-të kryen sulme në Karakas dhe kapën si Maduron ashtu edhe gruan e tij.
Fox News ka mësuar se Maduro mund të paraqitet të hënën në gjykatën federale në Nju Jork, ku ai u padit vite më parë.
