Trump kërcënon të përdorë ushtrinë për të shuar protestat në Minnesota

Presidenti amerikan Donald Trump kërcënoi të enjten se do të thërrasë Aktin e Kryengritjes për të dërguar forcat ushtarake në Minnesota pas ditëve të protestave të ashpra kundër rritjes së pranisë së agjentëve të emigracionit në rrugët e Minneapolisit.

Përplasjet mes banorëve dhe oficerëve federalë janë bërë gjithnjë e më të tensionuara pasi një agjent i Emigracionit dhe Doganave (ICE) vrau me armë një qytetare amerikane, Renee Good, në një makinë tetë ditë më parë në Minneapolis, dhe protestat u përhapën në qytete të tjera.

Kërcënimi i fundit i Trump-it erdhi disa orë pasi një oficer emigracioni qëlloi një shtetas venezuelian, që sipas qeverisë po ikte pasi agjentët tentuan të ndalonin automjetin e tij në Minneapolis.

“Nëse politikanët e korruptuar të Minnesota-s nuk zbatojnë ligjin dhe nuk ndalojnë agjitatorët profesionistë (person që nxit, provokon ose organizon trazira, protesta) dhe kryengritësit nga sulmet ndaj Patriotëve të ICE-së, të cilët thjesht po përpiqen të bëjnë punën e tyre, unë do të zbatoj AKTIN E KRYENGRITJES,” shkroi Trump në rrjetet sociale.

Trump prej javësh ka sulmuar udhëheqësit demokratë të shtetit dhe ka quajtur komunitetin somalez në zonë “plehra” që duhet të “dëbohen” nga vendi.

Ai ka dërguar tashmë gati 3 mijë oficerë federalë në zonën e Minneapolisit, të armatosur dhe të veshur me uniforma kamuflazhi ushtarake dhe maska që u mbulojnë fytyrat. Ata janë përballur shpesh me protesta të zhurmshme e të zemëruara nga banorët, disa duke fishkëllyer apo duke rrahur dajre.

Agjentët kanë arrestuar si emigrantë ashtu edhe protestues, duke thyer dritare dhe nxjerrë njerëz nga makinat, dhe janë akuzuar për raste ku kanë ndaluar qytetarë amerikanë me ngjyrë dhe latino-amerikanë duke u kërkuar identifikim.

“E neveritshme dhe e patolerueshme”

Departamenti Amerikan i Sigurisë Kombëtare (DHS), që mbikëqyr fushatën e Trump-it për emigracionin, tha se pak para të shtënave të së mërkurës, dy persona kishin sulmuar oficerin federal me një shkop dhe një lopatë bore, ndërsa ai po përleshej me venezuelianin në tokë jashtë një shtëpie ku ai po vraponte. Oficeri “qëlloi për vetëmbrojtje për të shpëtuar jetën e tij,” tha DHS.

DHS tha se burri ishte lejuar të hynte në SHBA nga administrata e Joe Biden në vitin 2022 përmes programit të lejes humanitare. Administrata e Trump-it, e cila ka kërkuar të shfuqizojë programet e epokës së Biden-it për emigracionin dhe azilin, e akuzoi atë se ishte në vend ilegalisht.

Reuters nuk ishte në gjendje të verifikonte versionin e DHS-së.

Shefi i Policisë së Minneapolisit, Brian O’Hara, tha në një konferencë për shtyp se FBI dhe Byroja e Krimeve të Minnesota-s po mblidhnin prova nga vendngjarja. Ai shtoi se plagët e burrit nuk ishin kërcënuese për jetën dhe se po shërohej në spital.

Kryetari i Bashkisë Jacob Frey, duke folur krah O’Harës, e quajti shtimin e ICE një pushtim dhe tha se kishte parë “sjellje nga ICE që është e neveritshme dhe e patolerueshme.”

“Ne nuk mund të jemi në një pikë në Amerikë ku dy entitete qeveritare po luftojnë hapur me njëri-tjetrin,” tha Frey.

Mbështetësit e Trump-it të ndarë mbi zbatimin e emigracionit

Akti i Kryengritjes i vitit 1807 i lejon presidentit të dërgojë ushtrinë ose të federalizojë Gardën Kombëtare të një shteti për të shtypur kryengritjet, si përjashtim nga ligjet që ndalojnë përdorimin e ushtarëve për zbatimin e ligjit civil ose penal. Ai është përdorur 30 herë në historinë e SHBA-ve, sipas Qendrës Brennan për Drejtësi në Universitetin e New York-ut. Gjykata e Lartë ka vendosur se vetëm presidenti mund të përcaktojë nëse kushtet e aktit janë përmbushur.

Trump ka ndërmarrë tashmë hapin e pazakontë të federalizimit të Gardës Kombëtare për të ndihmuar në zbatimin e ligjit të emigracionit në qytete të drejtuara nga demokratët, pavarësisht kundërshtimeve të guvernatorëve të shteteve, përfshirë Los Angeles vitin e kaluar, që një gjykatës e shpalli në dhjetor të paligjshme.

Veprimet agresive të Trump-it në Minnesota kanë ndarë mbështetësit e tij: 59% e republikanëve favorizuan një politikë që i jep përparësi arrestimeve nga oficerët e emigracionit edhe nëse njerëzit lëndohen, ndërsa 39% thanë se oficerët duhet të fokusohen në uljen e dëmit ndaj njerëzve edhe nëse kjo do të thotë më pak arrestime, sipas një sondazhi Reuters/Ipsos të publikuar të enjten.

Nëse Trump dërgon ushtarë në Minnesota, ai me shumë gjasa do të përballet me sfida ligjore nga shteti. Zyra e Prokurorit të Përgjithshëm të Minnesota-s ka paditur tashmë administratën Trump këtë javë, duke thënë se shtimi i ICE-së po shkelte të drejtat e banorëve të Minnesota-s, dhe të mërkurën kërkoi nga gjykatësja federale Kate Menendez të lëshojë një urdhër të përkohshëm për ta ndaluar.

Avokati Brian Carter, që përfaqëson Minnesota-n, i tha gjykatës se agjentët e Trump-it po angazhoheshin në një “model sjelljeje të paligjshme dhe të dhunshme,” përfshirë profilizim racor dhe hyrje të detyruar në shtëpitë e banorëve pa urdhër.

“Ata po na imponojnë këtë krizë,” tha Carter.

Në një postim në rrjetet sociale të enjten në mëngjes, Trump tha gabimisht se gjykatësja kishte “refuzuar të ndalonte” shtimin e ICE-së.

Në seancë, gjykatësja Menendez urdhëroi administratën Trump të përgjigjej deri të hënën ndaj ankesave të Minnesota-s, duke thënë se do të vendoste pas kësaj, duke e quajtur çështjen e ngritur nga padia e Minnesota-s “jashtëzakonisht të rëndësishme.”

“Ato kanë të bëjnë me marrëdhëniet shumë themelore mes qeverisë dhe shtetit e bashkive,” tha ajo.