LVV-ja diskuton për zhvillimet politike e konstituimin e institucioneve

Situata aktuale politike në vend, rezultati zgjedhor, procesi i certifikimit të rezultatit dhe konstituimi i institucioneve të reja, thuhet të kenë qenë temë diskutimi në mbledhjen e parë që është zhvilluar për këtë vit me drejtuesit e të gjitha qendrave të Lëvizjes Vetëvendosje, aty ku i pranishëm ka qenë edhe lideri i partisë, kryeministri në detyrë, Albin Kurti.

“Gjatë takimit u diskutua gjerësisht për situatën aktuale politike në vend dhe për fushatën tonë zgjedhore të suksesshme, e cila u kurorëzua me mbështetje qytetare prej 51.10% dhe 57 ulëse në Kuvendin e Republikës së Kosovës. Po ashtu, u trajtuan çështje që lidhen me procesin e certifikimit të rezultatit zgjedhor dhe konstituimin e institucioneve të reja”, thotë LVV-ja.

Ndërkaq, thonë se vëmendje e veçantë iu kushtua edhe aspektit organizativ të Lëvizjes, funksionimit dhe organizimit nëpër qendra.

“Lëvizja vetëvendosje mbetet e përkushtuar ndaj organizimit të brendshëm demokratik, përfaqësimit të denjë të qytetarëve dhe realizimit të programit tonë qeverisës në shërbim të republikës”, thuhet në njoftimin e LVV-së për këtë takim.