Pasojat e luftës së Trumpit me Iranin do të ndryshojnë botën

Lufta e nisur nga Donald Trump kundër Iranit, në bashkëpunim me Izraelin, ka tronditur politikën globale dhe ka futur aleatët e Shteteve të Bashkuara në një situatë të vështirë diplomatike dhe ekonomike. Sipas analizave ndërkombëtare, të raportuara nga CNN-i sulmet fillestare, ku u vra edhe lideri suprem iranian Ali Khamenei, shkaktuan kaos në rajon dhe tensione të reja në marrëdhëniet mes Uashingtonit dhe aleatëve të tij.

Shumë vende evropiane dhe të Lindjes së Mesme u gjendën përballë një konflikti që nuk e kishin parashikuar dhe për të cilin nuk ishin konsultuar. Disa qeveri u detyruan të evakuonin qytetarët e tyre nga zonat e rrezikut, ndërsa rritja e çmimeve të energjisë dhe pasiguritë ekonomike kanë tronditur tregjet ndërkombëtare.

Ndërkohë, reagimi i Iranit me raketa dhe dronë ndaj bazave dhe objektivave në vendet e Gjirit…, përfshirë Arabinë Saudite, Katarin dhe Kuvajtin, ka rritur frikën për një përshkallëzim më të gjerë të konfliktit. Sulmet kanë prekur edhe infrastrukturën energjetike dhe kanë rrezikuar një nga rrugët kryesore të transportit të naftës në botë.

Aleatët evropianë janë përpjekur të balancojnë kritikat ndaj metodave ushtarake me ruajtjen e marrëdhënieve me Uashingtonin, pasi siguria e tyre mbetet ende e varur nga mbështetja amerikane. Ndërkohë, në rajonin e Gjirit po rritet shqetësimi për pasojat ekonomike dhe për mundësinë e një krize refugjatësh, nëse Irani destabilizohet.

Analistët paralajmërojnë se fundi i luftës mund të jetë edhe më i komplikuar. Nëse regjimi iranian dobësohet por nuk rrëzohet, konflikti mund të vazhdojë me tensione të vazhdueshme. Ndërsa një destabilizim i plotë i Iranit mund të sjellë pasoja të rënda për stabilitetin global dhe për ekonominë botërore.