Kurti emëron Donika Gërvallën Koordinatore Kombëtare për mbrojtjen nga dhuna ndaj grave

Kryeministri i Kosovës, Albin Kurti, ka emëruar zëvendëskryeministren dhe Ministren e Drejtësisë, Donika Gërvalla-Schwarz, si Koordinatore Kombëtare për mbrojtjen nga dhuna në familje, dhuna ndaj grave dhe dhuna me bazë gjinore. Ky emërim synon të forcojë përkushtimin institucional ndaj parandalimit dhe adresimit të kësaj çështjeje të rëndësishme të sigurisë dhe të drejtave themelore të njeriut, shkruan IndeksOnline.

Në kuadër të këtij angazhimi, Qeveria ka zbatuar mbi 94% të aktiviteteve të Strategjisë Kombëtare për Mbrojtjen nga Dhuna në Familje dhe Dhuna ndaj Grave (2022–2026), duke përfshirë mbështetje financiare për strehimoret dhe ofruesit e shërbimeve sociale, si dhe miratimin e ligjeve dhe protokolleve shtetërore për trajtimin dinjitoz dhe të drejtë të viktimave. Ndër masat kryesore është edhe ofrimi i ndihmës juridike falas për viktimat dhe rritja e kapaciteteve për ndjekjen e autorëve të këtyre veprave penale.

Kurti thekson se puna për parandalimin dhe luftimin e dhunës ndaj grave dhe vajzave nuk do të ndalet, duke shprehur besimin se me Donika Gërvalla-Schwarz në këtë rol do të vazhdohet forcimi i mekanizmave dhe bashkëpunimit ndër-institucional për mbrojtjen dhe drejtësinë për të gjitha viktimat në Kosovë.

Postimi i plotë:

Kam emëruar zëvendëskryeministren e dytë, njëkohësisht Ministren e Drejtësisë, Donika Gërvalla-Schwarz Koordinatore Kombëtare për mbrojtje nga dhuna në familje, dhuna ndaj grave dhe dhuna në baza gjinore.Ky emërim forcon përkushtimin institucional për parandalimin dhe adresimin e dhunës, si një çështje të sigurisë njerëzore dhe të drejtave themelore.Përpjekjet tona për ta çrrënjosur dhunën ndaj grave dhe vajzave janë të vazhdueshme.

Po e trajtojmë dhunën ndaj grave si përgjegjësi të përbashkët institucionale e shoqërore.Përmes bashkëpunimit ndër-sektorial dhe një zinxhiri institucional të fuqizuar, kemi zbatuar Strategjinë Kombëtare për Mbrojtje nga Dhuna në Familje dhe Dhuna ndaj Grave (2022–2026), me mbi 94% të aktiviteteve të zbatuara ose në zbatim.Ndër hapat e ndërmarrë në këto vite janë edhe mbështetja financiare për strehimoret dhe organizatat e licencuara që ofrojnë shërbime sociale dhe familjare. Për periudhën 2021–2025 kemi ndarë 7.3 milionë euro për të forcuar kapacitetet e tyre dhe për shërbime më të mira dhe përkrahje më të qëndrueshme për viktimat.Kemi lansuar Protokollin Shtetëror për trajtimin e rasteve të dhunimeve seksuale, duke vendosur standarde të qarta për reagim institucional dhe trajtim dinjitoz të viktimave.

Në të njëjtën kohë, kemi zgjeruar qasjen në drejtësi duke ofruar ndihmë juridike falas për viktimat e dhunës në familje dhe dhunës me bazë gjinore, pavarësisht gjendjes së tyre socio-ekonomike.Për të mbështetur viktimat edhe në përballjen me pasojat e krimit, kemi miratuar Ligjin për Kompensimin e Viktimave të Krimit.Krahas këtyre masave, kemi avancuar edhe kornizën ligjore. Dhuna ndaj grave tashmë është e përcaktuar si vepër penale në Kodin Penal. Për personat që shpallen fajtorë për dhunë në familje dhe për dhunim seksual kemi vendosur dënime plotësuese, bashkë me prioritet për hetimin dhe gjykimin e këtyre rasteve.Përmes miratimit të projektligjit për shërbime sociale dhe familjare kemi nisur një reformë të thellë për Qendrat për Punë Sociale, ndërsa për raportim të unifikuar janë krijuar module të reja në bazën kombëtare të të dhënave për dhunën në familje.

Ministres Gërvalla-Schwarz i urova suksese në këtë detyrë me rëndësi të veçantë, duke shprehur besimin se me përkushtimin dhe përgjegjësinë institucionale që kërkon kjo pozitë do të vazhdohet forcimi i mekanizmave për mbrojtjen e grave dhe vajzave nga çdo formë dhune.Puna për adresimin e dhunës në familje dhe dhunës ndaj grave dhe vajzave nuk ndalet. Qeveria e Republikës së Kosovës mbetet e përkushtuar të forcojë parandalimin, mbrojtjen dhe drejtësinë për të gjitha gratë dhe vajzat.