Vdekja e Matthew Perry, çka do të ndodhë me ‘Mbretëreshën e ketaminës’?

Një grua nga Los Anxhelosi, e quajtur “Mbretëresha e Ketaminës”, është dënuar me 15 vjet burg për shitjen e drogës që çoi në vdekjen e aktorit të serialit “Friends”, Matthew Perry.

Jasveen Sangha, 42 vjeç, u deklarua fajtore shtatorin e kaluar për pesë akuza, përfshirë shpërndarjen e ketaminës që rezultoi në vdekje ose dëmtime të rënda trupore, raporton BBC News, transmeton Indeksonline.

Prokurorët e kanë përshkruar shtëpinë e britaniko-amerikanes si një “emporium droge” që financonte stilin e saj të jetesës luksoze.

Perry, i cili kishte luftuar me varësinë për vite me radhë, u gjet i vdekur në një vaskë të nxehtë në shtëpinë e tij në Los Angeles në tetor 2023.

Hetuesit përcaktuan se vdekja ishte për shkak të efekteve akute të ketaminës, një anestetik disociativ me veti halucinogjene që duhet të përdoret vetëm nën mbikëqyrje mjekësore.

Përpara shpalljes së dënimit, njerka e Perry-t, Debbie Perry, i kërkoi gjykatësit t’i jepte Sangha-s dënimin më të ashpër të mundshëm. Në një deklaratë me betim të paraqitur në gjykatë të martën, ajo pretendoi se Sangha kishte shkaktuar dëme “të pariparueshme”.

“Ju e shkaktuat këtë… Ju, që keni mjaftueshëm zgjuarsi biznesi për të fituar para, keni zgjedhur të vetmen rrugë që u shkakton dhimbje njerëzve”, tha ajo. “Ju lutem jepini kësaj gruaje të pandjeshme dënimin maksimal me burg, në mënyrë që ajo të mos dëmtojë familje të tjera si e jona.”/Indeksonline/