Ministri Maqedonci deklarohet pas certifikimit të rekrutëve të FSK-së nga radhët e komuniteteve

Ministri i Mbrojtjes, Ejup Maqedonci, ka theskuar se sot, Republika e Kosovës dhe Forca e Sigurisë së Kosovës shënojnë një moment të rëndësishëm, që reflekton qartë vizionin tonë për shtet dhe institucione që i përkasin të gjithë qytetarëve të saj.

Pranimi i 36 rekrutëve të rinj nga komunitetet jo shumicë është dëshmi konkrete e këtij angazhimi dhe e përkushtimit tonë për forcimin e integrimit dhe barazisë në sektorin e sigurisë.

“Të dashur rekrutë, nga sot uniforma që ju mbani është simboli i përgjegjësisë së lartë ndaj atdheut dhe qytetarëve tanë, pëgjegjësi që do të shoqërojë çdo ditë tuajën. Zgjedhja juaj për t’i shërbyer Kosovës është akt i pastër atdhedashurie, që nderon jo vetëm ju, por edhe familjet dhe komunitetet nga të cilat vini.

Forca e Sigurisë e Kosovës është ndërtuar mbi vlera të profesionalizmit, besnikërisë dhe multietnicitetit. Diversiteti që ju përfaqësoni e bën ushtrinë tonë më të fortë, më të drejtë dhe përfaqësuese të shoqërisë sonë.

Në këtë rrugëtim fisnik, ju inkurajoj të shërbeni me nder, krenari dhe përkushtim të palëkundur. Republika e Kosovës ka besim në ju.

Ju uroj suksese në çdo hap të karrierës suaj ushtarake”. /Indeksonline/