Lufta në Lindjen e Mesme, presidenti kinez del me një propozim katër pikësh

Presidenti kinez Xi Jinping të martën paraqiti një propozim me katër pika për promovimin e paqes dhe stabilitetit në Lindjen e Mesme, gjatë një takimi me Sheikh Khaled bin Mohamed bin Zayed Al Nahyan, princin e kurorës së Abu Dhabit, Emiratet e Bashkuara Arabe, në Pekin.

Xi bëri thirrje për respektimin e parimit të bashkëjetesës paqësore. Ai tha se është e domosdoshme të promovohet ndërtimi i një arkitekture sigurie të përbashkët, gjithëpërfshirëse, bashkëpunuese dhe të qëndrueshme për Lindjen e Mesme dhe rajonin e Gjirit…

Ai gjithashtu theksoi nevojën për respektimin e parimit të sovranitetit kombëtar. Sipas tij, sovraniteti, siguria dhe integriteti territorial i vendeve në Lindjen e Mesme dhe rajonin e Gjirit duhet të respektohen plotësisht, ndërsa siguria e personelit, objekteve dhe institucioneve të të gjitha vendeve duhet të mbrohet në mënyrë efektive.

Sa i përket respektimit të parimit të sundimit ndërkombëtar të ligjit, Xi tha se autoriteti i ligjit ndërkombëtar duhet të mbrohet për të parandaluar që bota të rikthehet në ligjin e xhunglës.

Ai tha gjithashtu se zhvillimi dhe siguria duhet të koordinohen. Të gjitha palët duhet të punojnë së bashku për të krijuar një mjedis të favorshëm për zhvillimin e vendeve në Lindjen e Mesme dhe rajonin e Gjirit.