Selena Gomez surprizon publikun me projektin më të guximshëm të karrierës së saj

Vetëm pak ditë pasi fansat komentuan në rrjetet sociale se Selena Gomez “dukej sërish si versioni i saj i vjetër” gjatë një eventi glamuroz në Londër, këngëtarja dhe aktorja po tërheq vëmendjen për një nga lëvizjet më të guximshme të karrierës së saj.

Ylli i dikurshëm i Disney Channel raportohet se do të jetë pjesë e një filmi të ri me elemente horror,  një kthesë e fortë larg imazhit të saj nga koha e serialit Wizards of Waverly Place.

Lajmi shkaktoi reagime të shumta në internet, me shumë fansa që u habitën nga ndryshimi drastik në zgjedhjet artistike të Gomez.

Pavarësisht reagimeve, Selena Gomez prej vitesh ka ndërtuar një profil shumë më të gjerë sesa ai i një ish-ylli Disney. Ajo është themeluese e markës së famshme të kozmetikës Rare Beauty, e cila raportohet të vlejë miliarda dollarë, ndërsa ka korrur sukses edhe si aktore me serialin Only Murders in the Building, rol që i solli nominime për Emmy, Golden Globe dhe SAG Awards.

Në muzikë, Gomez ka pasur disa albume dhe këngë në krye të klasifikimeve Billboard, përfshirë hitet “Good for You”, “Same Old Love”, “Hands to Myself” dhe “Lose You to Love Me”.

Projekti i ri u zbulua gjatë Festivalit të Filmit në Kanë, kur aktorja Cate Blanchett përmendi filmin gjatë një masterclass-i për kinemanë. Më pas u konfirmua se Gomez do të luajë përkrah Blanchett dhe Michael Fassbender në filmin e ri të regjisorit Brady Corbet.

Filmi, që thuhet se mban titullin The Origin of the World, raportohet të jetë një projekt  që do të eksplorojë më shumë se 150 vite histori amerikane, me fokus të veçantë në vitet ’70, mistikën dhe okultizmin.

Më herët, Corbet kishte deklaruar se projekti do të ishte “jashtë çdo zhanri tradicional”, duke lënë të kuptohet se bëhet fjalë për një film eksperimental dhe provokues.

Ky rol vazhdon transformimin artistik të Selena Gomez drejt projekteve më ndryshe dhe më të guximshme, pas performancës së saj të vlerësuar në Emilia Pérez, film që i solli një çmim në Festivalin e Kanës 2024.

Megjithatë, jo të gjithë fansat e pritën mirë lajmin. Në rrjetet sociale nuk munguan komentet kritike, me disa përdorues që e konsideruan projektin “shumë larg” imazhit me të cilin publiku është mësuar ta shohë Selena Gomez.

Të tjerë, ndërkohë, e mbrojtën vendimin e saj, duke argumentuar se artistët duhet të kenë lirinë të eksperimentojnë dhe të evoluojnë përtej roleve që i bënë të famshëm.