Aeroportet në zonën Shëngen mund të përballen me radhë të gjata dhe mbingarkesa

Ndërsa sezoni turistik i verës po nxehet, radhët dhe mbingarkesa në aeroporte po rriten për shkak të zbatimit të Sistemit Evropian të Hyrjeve/Daljeve (EES). Vlerësohet se sistemi nuk do të zbatohet plotësisht për dy vjet të tjera, dhe sipas një studimi të ri të porositur nga Këshilli Botëror i Udhëtimeve dhe Turizmit (WTTC), vonesat në kufij për shkak të futjes së EES mund të kërcënojnë deri në 41 milionë mbërritje vizitorësh dhe 45.4 miliardë dollarë amerikanë në shpenzime turistike në të gjithë zonën Shengen.

Studimi, i prezantuar në Madrid, bazohet në një anketë me më shumë se 2,500 udhëtarë nga Mbretëria e Bashkuar, Shtetet e Bashkuara, Kanadaja dhe Australia. Hulumtimi analizoi ndikimin e mundshëm të Sistemit të ri Evropian të Hyrjeve/Daljeve (EES) nëse udhëtarët që hyjnë rregullisht në zonën Shengen përballen me kohë pritjeje prej tre deri në katër orësh në kufij.

Rezultatet tregojnë se afërsisht një e treta e udhëtarëve do të kishin dukshëm më pak gjasa të vizitonin destinacionet e Shengenit ose do ta braktisnin udhëtimin e tyre krejtësisht nëse radhët e gjata në kufij do të bëheshin një pjesë e zakonshme e përvojës së udhëtimit.

Sistemi i ri Evropian i Hyrjeve/Daljeve (EES) supozohej të modernizonte kontrollet kufitare dhe të përmirësonte sigurinë, por edhe muaj pas futjes së tij në fuqi, udhëtarët ende përballen me kaos, vonesa dhe konfuzion kur kalojnë kufijtë. Frontex, agjencia përgjegjëse për ndihmën në menaxhimin e kufijve të jashtëm të Bashkimit Evropian, ka pranuar se mbledhja e të dhënave biometrike ishte një nga arsyet kryesore për vështirësitë fillestare në zbatimin e sistemit të ri./Indeksonline/