Mbi 800 mijë euro për sigurimin e objekteve të QKUK-së, shpallet kompania fituese

Qendra Klinike Universitare e Kosovës (QKUK) ka publikuar njoftimin për nënshkrimin e kontratës që ka të bëjë me ofrimin e shërbimeve të sigurimit fizik të objekteve të saj.

Sipas të dhënave të publikuara në platformën e prokurimit publik, kontrata ka një vlerë të parashikuar prej 836,952 euro, ndërsa është realizuar përmes procedurës së negociuar pa publikim të njoftimit të kontratës, në përputhje me Ligjin për Prokurimin Publik.

Objekti i kontratës është ofrimi i shërbimeve të sigurimit fizik për objektet e QKUK-së, ndërsa njoftimi për nënshkrimin e kontratës është publikuar më 9 korrik 2026. Afati për dorëzimin e ofertave ose kërkesave për pjesëmarrje ka qenë 7 korrik 2026, ndërsa data e dërgimit të njoftimit është 8 korrik 2026.

Sipas njoftimit të Autoritetit Kontraktues, kontrata i është dhënë operatorit ekonomik Defence Security Sh.P.K. me vlerë totale të ofertës prej 836,627.29 euro.

Ky aktivitet i prokurimit lidhet me sigurimin fizik të objekteve të QKUK-së, një proces që gjatë këtij viti është shoqëruar edhe me ankesa dhe procedura të shqyrtimit në Organin Shqyrtues të Prokurimit.