Nora Gjakova kalon në çerekfinale të Grand Prixit në Gjeorgji

Nora Gjakova e ka nisur mbarë Grand Prix-in që po mbahet në Tbilisi, duke korrur fitoren e parë.

Xhudistja kosovare ka mposhtur me ippon xhudisten turke Seyma Ozerler, ndeshje kjo e vlefshme për rundin e dytë në kategorinë e peshave -57 kilogramë.

Gjakova e kaloi rrethin e parë pa luftë, ndërsa për të ardhur deri në këtë pikë xhudistja turke u përball me xhudisten nga Bjellorusia, Ulyana Minnenkova.

Në çerekfinale, Gjakova do të përballet me xhudisten nga Gjeogjia, Eteri Liparteliani.

Në këtë garë, Kosovën do ta përfaqësojnë kampionia e Evropës dhe sportistja më e mirë e Kosovës për vitin 2018 e zgjedhur nga Komiteti Olimpik i Kosovës, Nora Gjakova, si dhe kampionia e Evropës për U-23, Loriana Kuka.

Nora po garon sot në kategorinë e saj (deri në 57 kilogramë), ndërsa Loriana garon të dielën në kategorinë deri në 78 kilogramë.

Xhudistët e tjerë si Majlinda Kelmendi, Distria Krasniqi e Akil Gjakova, do të pushojnë. Të pesë xhudistët kosovarë momentalisht kanë normat Olimpike Tokio 2020. Nora është e katërta në kategorinë e saj në renditjen Olimpike, ndërsa Loriana e 15-ta. /IndeksOnline/