Hoxhaj: Sa ka delegatë të PDK-së në Prizren, partitë tjera nuk kanë anëtarë
Partia Demokratike e Kosovës po mban Kuvendin Zgjedhor në Prizren, prej ku drejtues të kësaj partie kanë deklaruar se këtë kuvend zgjedhor e shohin si mundësi që të konsolidojnë edhe më shumë PDK-në.
Nënkryetari i PDK-së, Enver Hoxhaj, para delegatëve të Partisë Demokratike të Kosovës në Prizren, ka thënë se kjo parti ka strukturë të mirëfilltë organizative.
“Ta shohim këtë kuvend zgjedhor si një mundësi si ta konsolidojmë edhe më shumë Partinë Demokratike, se si ta zgjerojmë edhe më shumë PDK-në, si ta forcojmë më shumë, sa më e madhe PDK-ja, aq më e fortë është edhe Kosova. PDK ka strukturë të mirëfilltë organizative, sa jeni në sallë ju sot si delegatë këtu në Prizren, partitë tjera politike nuk kanë anëtarë”, tha ai.
Kurse, Hajredin Kuçi, nënkryetar i partisë tha se Prizreni paraqet krenari dhe identiteti.
“Kur PDK dega në Prizren i ka fituar zgjedhjet, ne i kemi fituar zgjedhjet në krejt Kosovën, dhe nëse dikush thotë që themeli i zgjedhjeve tona, pista e zgjedhjeve të Partisë Demokratike është në Drenicë, e kulmi po u them që është në Prizren, e neve na duhet një fuqizim i tillë. Ju na keni ndihmuar të krijojmë identiteti në Partisë Demokratike të Kosovës, prej një partie të tentuar, na kenë dhënë idenë partisë gjithëkombëtare në Republikën e Kosovës dhe në fund idenë e krenarisë”, tha ai.
Ndërsa Kujtim Gashi, ministër i Kulturës, Rinisë dhe Sportit, tha se sot po u japin mesazh të qartë partive të tjera politike dhe të gjithë të tjerëve, që janë të gatshëm të kthejnë qeverisjen në Prizren.
“Kuvendi i degës sonë, Kuvendi i Prizrenit që mbahet sot është edhe një mesazh për të gjitha degët. Po përtej kësaj është mesazh për të gjitha partitë politike në Republikën e Kosovës. Jam i vetëdijshëm dhe të gjithë jemi të sigurtë që të gjitha partitë kanë pritur që ky kuvend të jetë kuvend i ndarjes, të jetë kuvend ku ne do të kemi probleme, por ja që është e kundërta, është kuvend i unitetit, kuvend ku të gjithë jemi bashkë, është kuvend ku platformës dekada e re, kryeministrit të ardhshëm Kadri Veseli, dhe PDK-së në nivel Kosove, i kemi treguar se ne jemi ata të cilët për një dekadë të tërë i kemi sjellë 10 fitore PDK-së”, tha ai.
Ai tha se PDK është e gatshme të kthejë qeverisjen në Prizren, të cilën sipas tij, ua kanë vjedhur nga duart partitë e tjera me një koalicion të panatyrshëm dhe me një kryetar që nuk i kryen detyrat e tij./Indeksonline/
