Apeli i ambasadës amerikane dy ditë para zgjedhjeve në Shqipëri

Ambasada e Shteteve të Bashkuara të Amerikës ka bërë thirrje për zgjedhje të qeta dhe transparente në Shqipëri.

Përmes një njoftim i për media, kjo ambasadë ka kërkuar nga udhëheqësit politikë që të kundërshtojnë çfarëdo përpjekje për pengimin e procesit zgjedhor.

Më tutje, ambasada e ShBA-së,  bën thirrje që pas zgjedhjeve, udhëheqësit të rikthejnë vëmendjen tek forcimi i institucioneve demokratike dhe zbatimi i ligjit.

Më poshtë gjeni njoftimin e plotë:

Ambasada e Shteteve të Bashkuara të Amerikës i bën thirrje të gjithë udhëheqësve politikë, zyrtarëve të qeverisë, agjencive të sigurisë dhe qytetarëve shqiptarë që të sigurohen që zgjedhjet e 30 qershorit të zhvillohen në mënyrë të qetë dhe transparente. Ne nxisim udhëheqësit politikë të refuzojnë çdo dhe të gjitha llojet e dhunës, apo çdo përpjekje për të penguar procesin zgjedhor apo edhe të drejtën e çdo qytetari për të votuar. Dhuna nuk është një mënyrë legjitime e të shprehurit politik. Ata që përfshihen në akte dhune duhen hetuar me të gjithë fuqinë e ligjit.

Shtetet e Bashkuara do të kenë ekipe vëzhguesish në qendrat e votimit dhe qendrat e numërimit në mbarë Shqipërinë. Ne do të mbështetemi në raportin e OSBE/ODIHR-it për të vlerësuar rregullsinë e votimit.

Ne nxisim udhëheqësit politikë që, pas zgjedhjeve të së dielës, të rikthejnë vëmendjen e tyre në forcimin e institucioneve demokratike shqiptare dhe zbatimin e ligjit, përfshirë edhe ecjen përpara me ngritjen e një Gjykate Kushtetuese të drejtuar nga gjykatës të cilët e kanë kaluar vetingun. Miratimi i reformave zgjedhore dhe zbatimi i reformës në drejtësi janë thelbësore për aspiratat europiane të Shqipërisë dhe për ngritjen e demokracisë së fortë që i shërben të gjithë shqiptarëve.