Prokuroria kërkon paraburgim për vëllain e Xhafer Tahirit, pas incizimeve që u publikuan në Indeksonline

Prokuroria Themelore në Mitrovicë, Departamenti i Krimeve të Rënda, ka kërkuar nga Gjykata Themelore në Mitrovicë, caktimin e paraburgimit për dy të ndaluarit, Salih Tahiri nga Vushtrria, i dyshuar për veprën penale “Ushtrim i ndikimit“ nga neni 424 paragrafi 1 të Kodit Penal të Republikës së Kosovës (KRPK), dhe Sh.K, nga Vushtrria, i dyshuar për veprën penale “Ushtrim i ndikimit“ nga neni 424 paragrafi 2 të Kodit Penal të Republikës së Kosovës (KRPK).

Deri tek ndalimi i të dyshuarve në fjalë ka ardhur pas publikimit të video-incizimit nga portali Indeksonline, e në të cilin incizim dëgjohet Salih Tahiri i cili është vëllau i kryetarit të Komunës së Vushtrrisë, Xhafer Tahiri.

“Me tu publikuar video-incizimi, Kryeprokurori i Prokurorisë Themelore në Mitrovicë – Shyqyri Syla, ka urdhëruar Njësinë Rajonale për Hetimin e Krimit Ekonomik dhe Korrupsionit në Mitrovicën e Jugut, që të nisë hetime përkitazi me publikimin e këtij video-incizimi, ku pas hetimeve janë ndaluar dy të dyshuarit S.T dhe Sh.K, dhe për momentin gjenden në ndalim 48 orësh”, thuhet në njoftim të Prokurorisë.

Seanca dëgjimore për caktimin e masës së paraburgimit pritet të mbahet para gjyqtarit të procedurës paraprake në Gjykatën Themelore në Mitrovicë./Indeksonline/