Arrestohen 2 punonjës policie e një zjarrfikës, përvetësuan ndihmat e banorëve të prekur nga tërmeti

Dy punonjës policie, një punonjës i Shërbimit zjarrfikës, janë arrestuar si edhe u proceduan penalisht 2 shtetas për veprat penale: “Mashtrim” dhe “Shpërdorim detyre”.

Procedimi i tyre u krye pas hetimeve të zhvilluara në lidhje me publikimin e një video në media, ku shfaqeshin pamje të transportimit e përvetësimit të një sasie të konsiderueshme pakosh ushqimore,  të cilat janë sekuestruar në cilësinë e provës materiale e që ishin të destinuara për banorët e prekur nga situata e tërmetit.

Shërbimi për Çështjet e Brendshme dhe Ankesa, ka arrestuar mbrëmë në flagrancë shtetasit: A.Z., me detyre shef i Seksionit të Rendit pranë Komisariatit të Policisë Rinas, për veprën penale të “Mashtrimit në bashkëpunim”; E.H., me detyrë Komandant skuadre në Seksionin e Rendit pranë Komisariatit të Policisë Rinas për veprën penale “Shpërdorim detyre” dhe  A.T., me detyrë punonjës i shërbimit zjarrfikës pranë PMNZSH-së Kombinat, për veprën penale të “Mashtrimit, e kryer në bashkëpunim”.

Gjithashtu janë proceduar në gjendje të lirë shtetaset V.Z. dhe SH.T. për veprën penale të “Mashtrimit”, kryer në bashkëpunim.