Prishtina bën blerjen më të madhe të janarit, Oto Johni rikthehet në Superligë

Prishtina e ka rikthyer në Superligën e Kosovës njërin nga sulmuesit më të mirë nga paslufta, Oto John. Sulmuesi nigerian vjen si transfer nga Skëndërbeu i Shqipërisë.

Johni famën e madhe e ka pasur me Trepçën ’89 ku për dy vjet kishte shënuar 44 gola dhe ishte shpallur kampion i Kosovës.

“Në Prishtinë vendosa të vija, sepse ka ekip të mirë dhe janë klub me famë. Dhe, kur më ftoi kryetari Ejupi, e pash një mundësi të mirë për mua që të jap më të mirën për klubin. Po, kam luajtur dy vjet më parë këtu, edhe pse patjetër që ka ndryshime, mund të them se e njoh ligën dhe futbollin këtu. E di si luhet, e di çfarë kërkohet dhe shpresoj shumë që të jap ndihmën time të nevojshme për ekipin”.

“Tifozëve, bashkëlojtarëve, të gjithëve në klub, ju premtoj se do të japë gjithçka nga vetja që t’ju shpaguaj besimin që kanë në mua. Pse jo, edhe pse është ndryshe, shpresoj që të kem paraqitje sikurse para dy vjetësh me Trepçën ’89 kur kisha formë të lartë dhe pata ndihmuar atë skuadër të shpallej kampione. Besoj shumë të Prishtina dhe krejt çfarë duhet është të kem edhe pak fat. Titulli nuk është i pamundshëm me gjithë se diferencat ndërmjet skuadrave nuk janë të mëdha dhe lufta për titull është e ashpër, por unë besoj që mund të jem Oto edhe më i mirë se te Trepça ’89 dhe të ndihmoj skuadrës drejt qëllimit që ka” ka thënë sulmuesi./Indeksonline/