Vitia për viktimën e 16-të nga COVID-19: S’ka fjalë çfarë ndjejmë ne dhe stafi mjekësor që e asistoi gjatë këtyre ditëve

Ministri i Shëndetësisë, Arben Vitia reaguar pas vdekjes së 40 vjeçare nga Gjakova, e cila po priste fëmijë.

Vitia tha se komplikimet nga COVID-19 ia prenë jetën dhe ëndrrën në mes dhe se në këtë dhimbje të dyfishtë të familjes dhe miqve, marrim pjesë të gjithë.

Vitia tha se na duhet forcë e disiplinë për të shmangut dhimbjet e tjera dhe se kurrë nuk është mjaftë kujdes, por nuk duhet shpërqendruar nga mbrojtja në këtë betejë që hera-herës i kapërcen mundësitë e deritanishme, transmeton Indeksonline.

Postimi i plotë:

Sot morëm njoftimin e rëndë për humbjen e jetës së bashkëqytetares sonë. Ajo priste të bëhej nënë. Komplikimet nga Covid-19 ia prenë jetën dhe ëndrrën në mes.

Marrim pjesë në këtë dhimbje të dyfishtë të familjes e miqve!

Nuk ka fjalë ajo çfarë ndjejmë ne dhe gjithë stafi mjekësor që e asistoi gjatë tërë këtyre ditëve të vështira.

Të nderuar qytetarë, na duhet forcë e disiplinë për të shmangur dhembje të tjera.

Të mbrojmë veten dhe të dashurit tanë. Jeta ka vlerë sepse ajo e bën të mundur çdo shpresë e çdo projekt.

Kurrë nuk është mjaft kujdesi. Le të mos shpërqendrohemi nga mbrojtja në këtë betejë që hera – herës i kapërcen mundësitë tona të deritanishme.

Të zbatojmë rregullat, të mbrojmë e shpëtojmë jetë. Duhet të besojmë realisht që kjo fazë është e përkohshme dhe nuk duhet të rrezikojmë një jetë të tërë nga pakujdesitë në këto pak javë.