A do të largohet Rashica në janar nga Werderi? Flet agjenti i tij

Afati kalimtar dimëror nuk do ta lëkundë Milot Rashicën nga Werder Bremeni, sipas agjentit të tij, Altin Lala dhe drejtorit sportiv të klubit, Frank Baumanni.

23-vjeçari raportohet se ka tërhequr interesin nga AC Milani, por Lala përjashton që klienti i tij mund të largohej nga Weserstadioni në janar, transmeton Indeksonline.

“Ndoshta janë të interesuar, por të them lamtumirë në dimër s’bëhet fjalë”, i tha Lala Kickerit.

Drejtori sportiv i Werderit, Frank Baumann, gjithashtu e bën të qartë se Rashica, do të qëndrojë deri në fund të sezonit, por është i vetëdijshëm që klubi mund të mos jetë në gjendje ta mbajë anësorin deri në fund të karrierës së tij.

“Hapi tjetër do të vijë në një pikë. Por përfundimisht jo këtë dimër”, tha Baumanni.

Rashica ka bërë tetë paraqitje për Werderin këtë sezon, duke arritur gjashtë gola dhe dy asistime./Indeksonline/