21:13 / E Diele, 29 Mars 2020

A do të ndryshoj përsëri lokacioni i Stadiumit Kombëtar?

Që nga pranimi i Kosovës në FIFA dhe UEFA është premtuar se do të ndërtohet një stadium i madh ku do të jetë shtëpia e Kombëtares për ndeshjet në shtëpi.

Kërkesat e mëdha për bileta në ndeshjet e Ligës së Kombeve dhe kualifikueset për Euro 2020 kanë bërë që një stadium me një kapacitet më të madh ulësesh të jetë i domosdoshëm.

Çdo qeveri që ka kaluar nga atëherë e ka premtuar se stadiumi do të filloj të ndërtohet gjatë mandatit të tyre, por që deri më sot gjithçka ka mbetur në letër, shkruan Indeksonline.

Një problem që në çdo pushtet është hasur ka qenë lokacioni se ku do të ndërtohet impianti i Kombëtares, me çdo qeveri me një vend të caktuar.

Në kohën kur kryeministër ishte Isa Mustafa dhe ministër i Sportit ishte Kujtim Shala ishte paraparë që stadiumi do të ndërtohej në Bernicë, në një vend në periferi të Prishtinës.

Kur në pushtet erdhi Ramush Haradinaj dhe si ministër i Sportit ishte Kujtim Gashi, atëherë vendi i stadiumit u përcaktua periferia e Drenasit, në Koorroticë.

Madje kjo qeveri arriti edhe të prezantoj projektin, ku stadiumi do të kishte një kapacitet prej 30.000 vendesh.

Ardhja në pushtet e qeverisë Kurti dhe në krye të ministrisë së Sportit u vendos Vlora Dumoshi u rikthye përsëri tema e lokacionit të stadiumit, ku u përcaktua të ndërtohet në Bernicë.

Qeveria aktuale është në detyrë dhe shumë shpejtë mund të kemi një qeveri tjetër, me të edhe një lokacion të ri se ku do të ndërtohet stadiumi.

Megjithatë e rëndësishme është që ky projekt të jetësohet, pavarësisht vendit se ku do të ndërtohet.

Përveç prezantimit, deri më tani nuk ka pasur asnjë zhvillim konkret. /IndeksOnline/