A duhet të japë dorëheqjen Hashim Thaçi, nëse ftohet nga Gjykata Speciale?
Shumica e liderëve në vend kanë marrë thirrjet nga Gjykata Speciale, së cilës i janë përgjigjur pozitivisht.
Presidenti i vendit, Hashim Thaçi mbetet ende i “paprekur” nga Gjykata…, e cila ishte themeluar me inicimin e raportit të Dik Martit, ku në fokus të akuzave ka qenë pikërisht figura e tij.
Por, a duhet që Hashim Thaçi të japë dorëheqjen në rast se do t’i vinte thirrja nga Gjykata Speciale?
Përballë situatës së njëjtë, Ramush Haradinaj dha dorëheqjen pak muaj më parë. Ky akt u prit mirë nga faktori politik vendor dhe ndërkombëtar.
Pasi që akuzat ndaj liderëve kosovarë lidhen kryesisht me krime lufte, asnjë lider nuk do të duhej që ta përfaqësonte shtetin në asnjë institucion drejtësie si lider i akuzuar, por si një qytetar i thjeshtë që me krenari dikur ka mbrojtur luftën e pastër çlirimtare.
Thirrja e mundshme e Thaçit dhe përgjigjja e tij pozitive ndaj Gjykatës Speciale si një qytetar e jo si president do të jepte shembullin e radhës në politikën vendore që Kosova është mbi të gjitha.
Fillimi i vitit 2020 pritet të ketë zhvillime të rëndësishme në politikën kosovare, por gjithashtu edhe në punën që po bën Gjykata Speciale, e cila ishte themeluar pikërisht me shumicë votash në Parlamentin e Kosovës./Indeksonline/