AAK prezanton kandidatin dhe programin për Prishtinën, merr pjesë edhe Ramush Haradinaj

Aleanca për Ardhmërinë e Kosovës (AAK), sot në një takim solemn ka prezantuar Programin e saj për Prishtinën, me të cilën paraqitet në zgjedhjet lokale të cilat do të mbahen më 17 tetor të këtij viti.
Me sloganin “E para Prishtina”, kjo parti ka shpalosur listën e kandidatëve për Asamble të cilës do t’i prijë kandidati për kryetar të Prishtinës, Daut Haradinaj.

Kryetari i AAK-së, Ramush Haradinaj ka listuar edhe një herë disa nga punët të cilat janë realizuar në mandatin sa ishte Kryeministër i Kosovës.
Haradinaj tha se Prishtina ka dije e intelektualë të shquar që ndikuan në tërë vendin dhe lanë gjurmë në kulturën dhe historinë e Kosovës.
“Prishtina ka rrënjë të thella e të çmuara, ka rrënjë familjet e vjetra e me traditë qytetare. Prishtina ka dije e intelektualë të shquar, që ndikuan me dijen e tyre në tërë vendin dhe lanë gjurmë në kulturën e historinë tonë”, u shpreh Haradinaj.
Tutje Haradinaj ka folur edhe për kandidatin e AAK-së për Prishtinën, Daut Haradinaj të cilin e lavdoi për kontributin e dhënë në luftë dhe paqe.
“Prishtina ka shumë punë. Këto punë i kryen veq Dauti, i cili ka vizion, ka zemër të madhe dhe ka vullnet, bashkë me kandidatet e kandidatët për Prishtinën”, tha Haradinaj.

Ai shtoi se Prishtina ka gjak të ri që i vjen nga e gjithë Kosova dhe trevat shqiptare, Me mijëra të rinj, vendosin çdo vit të jetojnë këtu në Prishtinë, duke e pasuruar gjithmonë me energji të reja.

“Prishtina ka shpirt që i mbijetoi të gjitha krizave dhe tragjedive, jetoi dhe qëndroi në çdo kohë, ka shpirt që jetoi edhe në luftë, jetoi në lëvizjet e veta, në qytetarinë dhe stilin e veçantë, edhe jashtë vendit. Prishtina ka gjak të ri që i vjen nga e gjithë Kosova dhe trevat shqiptare, Me mijëra të rinj, vendosin çdo vit të jetojnë këtu në Prishtinë, duke e pasuruar gjithmonë me energji të reja. Prishtina ka vizion, resurse dhe mundësi. Prishtina është gati sot për të qenë shpresa dhe për të dhënë jetë qytetarëve të Prishtinës”, përfundoi Haradinaj.