Abdixhiku: Mali i Zi mbetet partner i rëndësishëm rajonal për Kosovën

Presidenti i Malit të Zi, Milo Gjukanoviq i cili po qëndron për vizitë zyrtare në Kosovë, është pritur në takim edhe nga kryetari i LDK-së, Lumir Abdixhiku.

Këtë e ka bërë të ditur, vet Abdixhiku, përmes një postimi në profilin e tij në rrjetin social Facebook.

Sipas Abdixhikut, Mali i Zi si vend anëtar i NATO-s mbetet partner i rëndësishëm rajonal për Kosovën.

Postimi i tij i plotë:

Sot, me bashkëpunëtorë, takuam Presidentin e Malit të Zi, Milo Gjukanoviq. Biseduam për të ardhmen e dy shteteve tona dhe perspektivën euro-atlantike që Kosova dhe Mali i zi si shtete fqinje kanë.

Mali i Zi, vend anëtar i NATO-s, mbetet partner i rëndësishëm rajonal për Kosovën. Presidentin Gjukanoviq e falenderova për rolin mbështetës të shtetit të tij në proceset integruese të Kosovës, me theks të veçantë për pranimin e Kosovës në Këshill të Evropës e në familjen e përbashkët ushtarake të NATO-s.

LDK vlerëson orientimin e qartë të Malit të Zi në rrugëtimin e përbashkët euro-atlantik, si dhe bashkëpunimin rajonal brenda procesit të Berlinit. Presidentit Gjukanoviq i pranova me kënaqësi dhe ftesën e bërë për vizitë të radhës në Podgoricë.