Abdixhiku uron Pashkët: Le të jetë kjo festë e ripërtëritjes së dashurisë ndaj atdheut tonë, Kosovës

Kryetari i Lidhjes Demokratike të Kosovës Lumir Abdixhiku, ua ka uruar festën e Pashkëve të gjithë besimtarëve të krishterë në Kosovë.

Abdixhiku në llogarinë e tij zyrtare në rrjetin social Facebook, ka shkruar se kjo festë ka simbolin e vetë sakrificës së Krishtit dhe shpëtimin e tij nga Zoti drejt drejtësisë dhe paqes.

Postimi i plotë i Abdixhikut në Facebook:

Qytetarë të besimit të krishterë,

Kremta e festës së Pashkëve, është kremtë rikujtuese e ringjalljes dhe përtëritjes; dhe kështu është shenjë e ngadhënjimit të vet jetës mbi vdekjen.

Gjatë kësaj dite të shenjtë, shembulli i dashurisë, besnikërisë dhe vet sakrificës së Krishtit – i përcjellë me mëshirë dhe shpëtim nga Zoti – mbeten udhëzues të patjetërsueshëm drejt drejtësisë dhe dhembshurisë; drejt paqes dhe shpresës për jetë më mirë.

Prandaj, në emrin tim dhe të Lidhjes Demokratike të Kosovës, gëzuar Pashkën. Le të jetë kjo festë e paqes e dashurisë rreth jush e familjeve tuaja; por mbi të gjitha, le të jetë festë e ripërtrirjes së dashurisë ndaj atheut tonë, Kosovës.

Për shumë mot, gëzuar Pashkët!