Afrohet procedura për shkarkimin e Trumpit Presidenti: Do të zbardhë bisedën e plotë me Zelenskyn

Presidenti i Shteteve të Bashkuara Donald Trump ka vendosur të zbardhë të gjithë bisedën e kryer me homologun ukrainas Volodimyr Zelensky, që po shkakton një skandal politik që mund t’i japë udhë procedurës për shkarkimin e presidentit.

Vendimi për zbardhjen e dialogut, ku sipas disa burimeve nga Trumpi i bëhej presion Ukrainës të hetonte djalin e kandidatit demokrat Joe Biden, (kundrejt lëvrimit të një ndihme 400 milionë dollarëshe në armatime, sipas burimeve të “Washington Post”-it) u bë publik nga vetë Trumpi me anë të një statusi në Twitter ku deklaronte se transkriptimi do të ishte “i pa censuruar dhe i plotë”.

Zbardhja e transkriptimeve sipas CNN-it nuk ka gjetur dakord të gjithë pjesëtarët e administratës, në veçanti sekretarin e Shtetit Mike Pompeo, i cili sipas burimeve mendonte se ky do të ishte një precedent i rrezikshëm në marrëdhëniet diplomatike.

Shtohen ndërkohë, zërat që mbështesin një procedurë impeachment, pra shkarkimin e presidentit, dhe pritet që kryetarja e Dhomës së Përfaqësuesve Nancy Pelosi të japë miratimin e saj për fillimin e kësaj procedure, që parashikon një hetim të detajuar nga komisioni i drejtësisë, që në qoftë se ka elementë të qenësishëm dërgon një raport Dhomës së Përfaqësuesve.

Në qoftë se kjo pjesë e Parlamentit amerikan voton për shkarkimin, fjala i shkon Senatit, aty ku duhen dy të tretat e tij për të formalizuar shkarkimin e Trumpit.