AGK reagon pas sulmit ndaj Valon Sylës

Asociacioni i Gazetarëve të Kosovës ka reaguar pas sulmit të mbrëmshëm ndaj gazetarit Valon Syla.

AGK ka dënuar sulmin, duke bërë thirrje ndaj institucioneve për zbardhje të plotë të rasitt dhe vënie të fajtorëve para drejtësisë.

Kujtojmë që Syla pësoi lëndime në kokë, për të cilat iu desh edhe tretman mjekësor.

Ky është reagimi i plotë i AGK-së:

Gazetari njëherësh drejtuesi i Gazeta Metro, është sulmuar fizikisht, të hënën në mbrëmje nga tre persona, të cilët dyshohet se e kanë përcjellë atë nga studio e T7, ku ishte i ftuar në debat, deri në lagjen Bregu i Diellit, në Prishtinë.  

Gazetari Syla ka pranuar trajtim mjekësor në Qendrën Klinike Universitare të Kosovës, teksa sipas deklaratave të tij të para për mediet, ka pësuar lëndime në kokë.  

Rasti është hapur në Policinë e Kosovës. Ky sulm për Asociacionin e Gazetarëve të Kosovës është krejtësisht i papranueshëm dhe përpjekje serioze për të penguar dhe minuar lirinë e shprehjes dhe lirinë e medies në Kosovë.

AGK-ja, u bënë thirrje institucioneve kompetente që të marrin masat e duhura që urgjentisht të arrestojnë personat përgjegjës për sulmin dhe që ata të vihen para drejtësisë.