AGK: Shqetësues dhe dekurajues votimi i Luljeta Aliut për anëtare të KPM-së

Asociacioni i Gazetarëve të Kosovës (AGK) ka reaguar pas zgjedhjes së Luljeta Aliut anëtare e Komisionit të Pavarur të Medieve.

Në reagimin e AGK-së thuhet se Asociacioni i Gazetarëve të Kosovës e ka përcjellur me shqetësim votimin në Kuvend të Luljeta Aliut, për anëtare të Komisionit të Pavarur të Medieve. 

“Votimi nga partia në pushtet, Lëvizja Vetëvendosje e një avokateje publike të politikave të saj në Qeveri, tregon hapur intencën e partisë në pushtet për të vënë nën kontroll institucionet e pavarura mediale.   Komisioni i Pavarur i Medieve duhet të ruajë pavarësinë politike dhe partiake, për të kryer në mënyrë të pandikuar punën për monitorimin dhe rregullimin e skenës audio-vizuale në Kosovë”, thuhet në reagimin e AGK-së..

Emërimi i Aliut sipas AGK-së shkon në kundërshtim me këtë përpjekje, dhe mund t’i kontribuojë klimës anti-medie që kjo qeveri ka krijuar, në shumë raste në dy vitet e fundit.