Ahmeti intensifikon takimet me lipjanasit, sot pati agjendë të ngjeshur

Kryetari aktual i Lipjanit, Imri Ahmeti, është duke vizituar familjet, bizneset dhe zhvilluesit e qytetit të tij, për të parë nga afër angazhimet, propozimet dhe hallet e tyre.

Në kuadër të fushatës zgjedhore, Ahmeti e nisi ditën në shkollën e futbollit “Lipjani 01”, ku u takua me fëmijët që ushtronin plot pasion, duke ndjekur ëndrrat e tyre sportive.

Nga aty, Ahmeti premtoi rritje subvencionesh për sportistët lipjanas.

“Sporti është forcë, disiplinë dhe shpresë për të ardhmen. Për këtë arsye kemi investuar vazhdimisht në infrastrukturën sportive dhe do të vazhdojmë ta bëjmë këtë.

Përgëzoj menaxhmentin e Klubut Futbollistik “Lipjani 01” për sukseset e arritura. Ne do të jemi gjithmonë në mbështetje të sportistëve tanë” u shpreh ai.

Tutje, ai u takua me banorët e Bregut të Zi dhe ata të fshatit Shalë.

Përpara tyre, Ahmeti prezantoi kandidatët për asamble komunale, Përparim Karpuzin dhe Arlinda Amerllahun.

“Po vazhdojmë të marrim përkrahje nga qytetarët që e vlerësojnë punën dhe vizionin tonë për Lipjanin. Shala na ka dhënë mbështetjen, dhe kur Shala e jep fjalën, e mban besën. Faleminderit Shala!

Gjithashtu, kërkuam mbështetjen për Arlindën si bijë e një ish-luftëtari të UÇK-së dhe një vajzë e shkolluar e e përgatitur për të marrë përgjegjësi në vendimmarrje” deklaroi Ahmeti.

Ahmeti do të kandidojë për një mandat të dytë në zgjedhjet lokale të 12 tetorit./IndeksOnline/