12:22 / E Martë, 21 Janar 2020

AKP-ja, shpall shitjen e re të aseteve përmes likuidimit nr. 54

Agjencia Kosovare e Privatizimit (AKP) zyrtarisht ka shpallur shitjen e aseteve përmes likuidimit numër 54.

Lista e tenderëve për privatizim me këtë valë të shitjeve përmban 93 asete-njësi atraktive të ndërmarrjeve shoqërore në Republikën e Kosovës, të cilat paraqesin një mundësi të shkëlqyer për zgjerim të biznesit apo iniciativa të reja biznesore në vendin tonë. 

Kjo valë e shitjeve me të gjitha asetet e tenderuara është miratuar në Bordin e Drejtorëve, ndërsa AKP-ja i ka njoftuar paraprakisht të gjitha komunat përkatëse se këto asete të ndërmarrjeve shoqërore do të privatizohen dhe ka shpallur njoftimin për tender në faqen e saj të Internetit www.pak-ks.org dhe në mediat e shkruara dhe ato elektronike.

Ofertat e mbyllura për njësitë-asetet që janë në shitje përmes shitjes së aseteve me likuidim nr.54 duhet të dorëzohen në sallën e konferencave – hoteli ‘Grand’, në Prishtinë më datën 19 shkurt 2020, nga ora 10:00 deri në orën 12:00, të shoqëruara edhe nga depozita e ofertës dhe tarifa për paraqitjen e ofertës, ashtu siç është parashikuar për secilin artikull.

Hapja e ofertave bëhet po të njëjtën ditë, duke filluar nga ora 12:30.